F’Replay Preview tal-lejla, li jixxandar fid-9pm fuq Net Television, se jkun hemm intervista interessanti mir-rokna ‘X’Sar Minnhom?’ mal-eks plejer internazzjonali, Martin Gregory li llum għandu 51 sena. Matul il-karriera tiegħu bħala plejer hu lagħab biss ma’ żewġ klabbs u li storikament huma rivali ta’ xulxin, Sliema Wanderers u Floriana.
Gregory beda’ u spiċċa l-karriera ma’ Sliema. Hu lagħab 63 partita mat-tim nazzjonali Malti u skorja gowl wieħed kontra l-Italja fl-1992 fl-iStadium Nazzjonali f’Ta’Qali. Rebaħ biss Kampjonat wieħed u ma’ Sliema.
Wara li temm il-karriera ta’ plejer, Gregory kompla fil-futbol bħala kowċ ma’ Sliema, Għargħur, Qormi u Melita. Fl-2012 iżda, wara li kiseb promozzjoni storika ma’ Melita fil-Kampjonat Premier u wara numru ta’ partiti fit-tmexxija tat-tim f’dan il-Kampjonat għażel li jieqaf mill-futbol. Minn dak iż-żmien ‘l hawn ma erġajnix rajna lil Martin involut fil-futbol domestiku.
F’din is-silta mill-intervista, Gregory jitkellem dwar kif reġa’ issieħeb lil Sliema wara li kien għamel sentejn u nofs bħala plejer ta’ Floriana.
Intant f’Replay Preview tal-lejla ikun hemm preview dettaljat għall-partiti kollha mid-19-il ġurnata tal-Kampjonat Premier fejn fost oħrajn jispikkaw żewġ derbies; Floriana kontra Valletta u Naxxar Lions kontra Mosta. Fil-programm ikun hemm intervisti kif ukoll l-aħħar aħbarijiet qabel kull partita mill-Kampjonat Premier.
Replay Preview tal-Ġimgħa filgħaxija hu mwassal bl-appoġġ ta’ Twistees, McVities, Carlsberg, GasanMamo Insurance, Best Deal Properties, King of Shaves u Malta Football Players Association.
Għal aktar informazzjoni dwar il-programmi Replay, li jixxandru fuq Net Television u Radio 101, wieħed għandu jidħol fil-paġna ta’ Replay fuq Facebook.
