L-awtoritajiet fit-Tuneżija imponew curfew għal matul il-lejl, effettiv għall-pajjiż kollu, bħala reazzjoni għall-inkwiet li qed jiżdied dwar in-nuqqas ta’ xogħol. Dan waqt li l-protesti li qamu madwar il-pajjiż irriżultaw f’sensiela ta’ inċidenti vandali f’numru ta’ bliet.
Il-Ministeru tal-Intern f’Tuneż fisser l-impożizzjoni tal-curfew bħala azzjoni meħtieġa u meta l-attakki fuq proprjetà privata u tal-pubbliku ‘jirrappreżentaw periklu għall-pajjiż u ċ-ċittadini tiegħu’.
Numru ta’ għases tal-Pulizija spiċċaw attakkati minn gruppi ta’ nies matul il-lejl tal-Ħamis u l-Ġimgħa, bir-riżultat li l-uffiċjali tas-sigurtà kienu kostretti jużaw il-gass tad-dmugħ kontra xi dimostranti armati bil-ġebel u bombi magħrufin bħala molotov cocktails.
Sadanittant, gruppi ta’ żgħażagħ attakkaw bank, filwaqt li serqu minn ħwienet u mħażen lejn il-limiti ta’ Tunis, il-kapitali tat-Tuneżija.
Il-Prim Ministru Tuneżin, Habib Essid, kellu jaqta’ fil-qasir żjara fi Franza biex jieħu ħsieb il-protesti, li bdew nhar il-Ħadd wara li żagħżugħ li ma irnexxilux jikseb xogħol mal-Gvern tela’ ma’ arblu tad-dawl bi protesta u miet b’xokk elettriku wara li kien tfixkel fil-wires.
