L-American Kennel Club irrikonoxxa Terrier mingħajr pil u kelb tal-kaċċa ta’ razza antika fl-Afrika ta’ Fuq, sloughi, li issa ngħaqdu mal-187 razza ta’ klieb rikonoxxuti minnu.
L-American hairless terrier u s-sloughi issa jistgħu jikkompetu f’kompetizzjonijiet organizzati mill-AKC u dalwaqt anke fil-Westminster Kennel Club show.
Ħafna American hairless terriers huma mingħajr pil għalkemm xi wħud għandhom pil qasir ħafna madankollu jġorru l-ġenetika ta’ klieb mingħajr pil. Il-bidu tagħhom imur lura lejn is-snin sebgħin, meta fost frieħ li twieldu lil koppja minn Louisiana, twieled ġeru mingħajr pil.
Minn hemm imbagħad bdiet it-trobbija u t-tnissil apposta ta’ dawn it-tip ta’ klieb, li huma ideali għal sports tal-annimali u anke biex jitrabbew minn min għandu allerġiji marbuta mal-pil tal-annimal. Huma wkoll klieb li faċli tgħix magħhom għaliex jistgħu jiġu mgħallma malajr.
Ir-razza sloughi jew Arabian greyhound żviluppat għall-kaċċa ta’ predi kbar bħall-għażżiela. Għandhom saqajn irqaq, simili għar-razza saluki ukoll mill-Afrika ta’ Fuq, u huma magħrufa għall-veloċità, għal kemm idumu jiġru, imma wkoll għall-grazzja li għandhom u għall-atteġġjament ta’ riservatezza.
Ermine Moreau-Sipiere, li hi l-president tal-American Sloughi Association, u li ilha trabbi dan it-tip ta’ kelb għal kważi 40 sena, qalet li dan il-kelb hu attent ħafna għall-familja li trabbih imma mhux it-tip li se jitla’ fuqek meta tkun bilqiegħda. Mhuwiex lanqas it-tip ta’ kelb li se joqgħod ifittxek il-ħin kollu.
Is-sloughi jeħtieġ paċenzja għat-taħriġ, irid ħafna eżerċizzju u jrid ukoll ħajt għoli madwar il-ġnien inkella jaqbeż ’il barra għax l-istint tal-kaċċa jagħmel bih.
L-AKC tirrikonoxxi razza ġdida jekk din ikollha diversi mijiet ta’ klieb imrobbija fil-pajjiż. Diversi għaqiet favur id-drittijiet tal-annimali huma kritiċi tat-tnissil tal-annimali u jinsistu li hemm ħafna klieb ta’ razez mhux puri li qed ifittxu li jiġu adottati. Imma l-AKC tinsisti li meta wieħed inissel kelb, il-karatteristiċi tar-razza jgħinu lis-sidien biex jantiċipaw kif se jġib ruħu l-annimal.
