L-Iżvezja qed taħseb biex tkeċċi sa 80,000 immigrant li waslu fil-pajjiż fl-2015 u li l-applikazzjonijiet tagħhom għall-kenn ma kenux milqugħa.
Il-Ministru għall-Intern Żvediż, Anders Ygeman, qal li filwaqt li l-indikazzjonijiet huma li se jkunu ddeportati xi 60,000, l-ammont tal-immigranti jista’, fil-fatt, jitla’ b’20,000 oħra. Ygeman kompla li l-Gvern kien talab lill-pulizija u l-awtoritajiet inkarigati mill-immigranti biex jorganizza t-tkeċċija tal-persuni indikati.
Il-miżura proposta tħabbret waqt li l-Ewropa qed tissielet ma’ kriżi wara li għexieren ta’ eluf ta’ immigranti waslu sal-bajjiet tal-Greċja. Ħafna minn dawn l-immigranti qegħdin jissugraw ħajjithom waqt vjaġġi mill-baħar huma u jaħarbu mill-konflitti fis-Sirja, l-Iraq u l-Afganistan.
Sadattant, il-Ministru Ygeman tkellem dwar it-tkeċċijiet u qal li fejn is-soltu, f’sitwazzjonijiet bħal dawn, jintużaw it-titjiriet kummerċjali, it-tkeċċijiet li jmiss iridu jsiru permezz ta’ ajruplani chartered speċjali. Dan minħabba l-ammont hekk kbir ta’ immigranti u meta l-proċess inkwistjoni għandu jsir fuq numru ta’ snin.
L-Iżvezja għandha popolazzjoni ta’ 9.8 miljun u hi fost il-pajjiżi tal-Unjoni Ewropea li daħħlu l-akbar numru ta’ refuġjati u immigranti. Fil-fatt, l-awtoritajiet fi Stokkolma, fl-2015, aċċettaw li jieħdu ’l fuq minn 160,000 refuġjat li qed ifittxu kenn politiku.
