Mument ta’ ferħ għal Anthony Busuttil, missier Adam Busuttil, li wara battalja ta’ emozzjonijiet reġa’ ngħaqad ma’ ibnu wara tfittxija ta’ ġimgħat. L-istorja bdiet f’Diċembru li għadda meta omm it-tifel ħarbet bih waqt li l-familja kienet għal btala fil-belt ta’ Praga fir-Repubblika Ċeka.
Adam u missieru, akkumpanjat mill-avukati tiegħu, irritornaw Malta lbieraħ għall-ħabta tal-11 p.m. f’titjira minn Frankfurt kif ikkomunikat mir-rappreżentanti legali tal-missier. Jidher li t-tifel kien interċettat qrib il-fruntiera hekk kif qed jiġi allegat li l-omm kienet se tivvjaġġa bih. Pass li kien ifisser li t-tifel jintilef legalment għal dejjem kieku ġara hekk.
Lura f’Diċembru, il-missier kien esprima id-dieqa tiegħu għall-fatt li ma kienx jaf fejn se jagħti rasu. Hu qatta’ ġimgħat fi Praga f’battalja legali biex jipprova jġib lil ibnu lura.
Anthony Busuttil u s-sieħba tiegħu Larisa Leontieva u binhom kienu marru flimkien fi Praga għal btala qasira li matulha Larisa kellha tkompli b’xi proċeduri biex tikseb iċ-ċittadinanza Maltija meta f’jum minnhom, qabdet u telqet ‘il barra bit-tifel b’kollox.
Minnufih, hu kien mar jagħmel rapport lill-Pulizija f’waħda mill-għases tal-Pulizija fi Praga iżda kollox irriżulta fin-negattiv.
Fl-aħħar ta’ Diċembru l-missier u l-avukati tiegħu marru Praga iżda wara numru ta’ ġranet ġew lura Malta mingħajr it-tifel, fejn f’kummenti lill-medja kienu ilmentaw li minkejja li kienu sabu lit-tifel, dan ma setax jinġieb lura Malta wara li l-omm kienet marret bih f’għassa tal-Pulizija.
Dan minkejja sentenza tal-qorti li kienet iddeċidiet li l-missier għandu jkollu l-kustodja sħiħa tat-tifel.
