Fil-kampjonat Masters MSVLIFE, kelna tlett partiti mirbuħa b’riżultati kbar u fejn issa bir-rebħa ta’ Hibernains, jinsabu żewġ punti biss taħt il-lijders Desana. B’koinċidenza nhar il-Ħamis, dawn iż-żewġ timijiet se jilagħbu kontra xulxin, fil-partita prinċipali li skont ir-riżultat nistgħu naraw lil Desana jerġgħu jibnu vantaġġ ta’ 5 punti, bi draw kollox jibqa l–istess, iżda rebħa għal Hibs tfisser li dawn isiru il-lijders il-ġodda.
Hibernians kellhom rebħa faċli ta’ 14-4 fuq Versity biex dawn baqgħu jistennew l-ewwel punti. Għal bidu Versity żammew tajjeb, iżda meta Hibs fetħu l-iskor wara 4 minuti, ma sabux soluzzjoni biex iwaqqfuhom u Hibs b’movimenti veloċi ddominaw. Għal Hibs, Malcolm Camilleri kien l-aħjar skorer b’ħames gowls, filwaqt li Glen Barry skorja tlieta.
Mosta Shaggy komplew mixja u kellhom rebħa oħra tajba ta’ 12-2 fuq Jival. It-tim ta’ Jival jidher li hemm diversi problemi bejn il-plejers fl-iskwadra u jeħtieġ li jsibu soluzzjoni biex jikkalmaw, jekk ma jridux jkollhom aktar diżappuntanti.
Wara r-rebħa tajba li kien għamlu kontra Desana, Mosta komplew għaddejjin u t-tim issa jidher maqgħud minkejja li reġa’ kellhom xi plejers nieqsa bħal Stefan Sultana. Michael Borg Olivier baqa’ jiskorja b’poker u l-istess għamel Leoandros Calleja. Iż-żewg gowls ta’ Jival ġew skorjati minn Abugella Wahashi.
Żabbar Masters ukoll kellhom rebħa tajba fuq Zurrieq Wolves 11-6. Zurrieq ma kinux inferjuri u kienu huma li fetħu l-iskor wara 10 minuti, iżda minkejja li baqgħu joffru reżistenza sofrew tlett gowls sakemm daħlu jistrieħu. Fit-tieni taqsima għal mumenti kienu minn taħt 5-3, u kollox kien għadu inċert, iżda imbagħad bħas-soltu bdiet dieħla l-għejja, sofrew sitt gowls mingħajr risposta u kien biss fl-aħħar li skorjaw tlett gowls minn Robert Magro l-aħjar player tagħhom li b’kollox skorja erba’ gowls. Għal Żabbar, għamel id-debutt Stefan Giglio ex plejer ta’ Valletta u timijiet oħra fil-Premier u anki lagħab fil-Bulgarja. Giglio skorja tlieta, daqs kemm skorja Stefan Farrugia biex dan issa tela’ fit-tieni post tal-aħjar skorers b’total ta’ 28 gowl.
Riżultati
Jival v Mosta 2-12 – A. Wahshi 2 (J), P. Bugeja 3, L. Calleja 4, M. Borg Olivier 4, B. Baldacchino (M)
Referee: R. Ambroggio
Zurrieq v Żabbar 6-11 – R. Magro 4, R. Caruana, M. Camilleri (Zu), S. Faarrugia 3, S. Giglio 3, A. Galea 2, E. Gauci, G. Scerri, S. Zerafa (Ż)
Referee: R. Galea
Hibernians v Versity 14-4 – M. Camilleri 5, G. Barry 3, Jon. Buttigieg 3, B. Sammut, L.Vella, D.Caruana (H), R. Schembri 2, C. Camenzuli, FX Pace (V)
Referee: R. Galea
Klassifika: Desana Vintage 24 punt, Hibernians Masters 22 punt, Mosta Shaggy 21 punt, Żabbar Masters 19-il punt, Rabat Cavette 10 punt, Zurrieq Wolves 8 punti, Jival 4 punti, Versity Legends 0
L-aqwa skorers: W. Borg (Desana) 31 gowl, S. Farrugia (Żabbar) 28 gowl, J. Gauci (Desana) 24 gowl
Logħob li jmiss: il-Ħamis 4 ta’ Frar 2016 – 6.45pm Desana v Hibernians, 8.00pm Mosta Shaggy v Rabat Cavette
