Tliet ex-uffiċjali tal-Assocjazzjoni Internazzjonali tal-Atletika (IAAF), u li kienu sospiżi għal għomorhom wara li nstabu ħatja li għattew il-każi ta’ doping tal-Federazzjoni tal-Atletika Russa, ħabbru li se jappellaw mis-sentenza.
Dawn resqu l-appell tagħhom quddiem il-qorti tal-arbitraġġ tal-isport u qed jitolbu li din is-sentenza tkun annullata.
It-tleit uffiċjali li kienu mkeċċija mill-Kummissjoni tal-Etika tal-IAAF huma Papa Massata Diack tas-Senegal, u ż-żewġ uffiċjali Russi Valentin Balakhnichev u Alexei Melnikov.
Diack hu t-tifel tal-ex President tal-IAAF Lamine Diack u kien kunsulent kummerċjali tal-istess IAAF.
L-Interpol qiegħda ukoll titlob l-arrest tiegħu fi Franza biex tkun tista’ tinvestigah.
Balkhnichev kellu karriera twila bħala President tal-Federazzjoni Russa tal-Atletika, kif ukoll serva għal diversi snin bħala teżorier tal-Federazzjoni Internazzjoli IAAF.
Melnikov kien il-kap tal-kowċis tal-atleti Russi.
Dawn it-tliet uffiċjali kienu kollha nstabu ħatja li rrikattaw lil maratoneta Russa Liliya Shoukhova, fejn dawn ħadulha mijiet ta’ eluf ta’ dollari biex iżommu mistur ir-rapport tagħha dwar doping qabel l-Olimpjadi ta’ Londra tas-sena 2012.
It-tlieta li huma dejjem saħqu li huma nnoċenti. Għad mhux magħruf meta se jibda jinstema dan l-appella quddiem il-qorti tal-arbitraġġ.
