L-iskejjel primarji f’San Pietruburgu se jinżammu magħluqa wara aktar minn 20 każ ta’ mewt f’din it-tieni l-akbar belt Russa minħabba s-Swine Flu.
Dan hekk kif fil-belt hemm ammont kbir ta’ nies li mardu bl-influwenza.
S’issa aktar minn 80 persuna mietu fir-Russja minħabba s-Swine Flu bl-awtoritajiet igħidu li ta’ kuljum qed jikkuraw mat-12,000 persuna b’sintomi ta’ influwenza u 80 fil-mija tagħhom aktarx huma Swine Flu magħrufa wkoll bħala H1N1.
Uffiċjali Russi qed jipprovaw jikkalmaw l-imħuħ tan-nies, iżda bi ftit li xejn suċċess. Veronika Skvortsova, il-Ministru tas-Saħħa, insistiet li s-sitwazzjoni kienet taħt kontroll.
Iżda f’San Pietruburgu, f’ħafna spiżeriji diġà spiċċaw il-mediċini li wieħed għandu jieħu għal din il-marda kif ukoll il-maskri għal fuq il-ħalq. L-awtoritajiet wiegħdu li kienu se jimlew l-ispiżeriji ta’ San Pietruburgu bil-mediċini meħtieġa kif ukoll bil-maskri biex iserrħu l-imħuħ.
