L-eks-First Lady tal-Istati Uniti, Hillary Clinton, u s-Senatur minn Vermont, Bernie Sanders, kellhom konfront televiżiv jaħraq fl-Istat ta’ New Hampshire fejn spikkaw id-differenzi bejn dawn ir-rivali li qed jittamaw li, f’Novembru, jikkuntestaw għall-Presidenza Amerikana f’isem il-Partit Demokratiku.
Dan kien l-ewwel dibattitu dirett bejn dawn iż-żewġ sfidanti ewlenin wara li l-eks-Gvernatur ta’ Maryland, Martin O’Malley, irtira l-kandidatura għat-tikketta Demokratika.
Sadanittant Clinton, li għamlet is-snin fil-kariga ta’ Segretarju tal-Istat Amerikan, u Sanders, is-Senatur minn Vermont, ikkonfrontaw lil xulxin, fost oħrajn dwar aspetti relatati għall-ekonomija, il-kura tas-saħħa u l-politika barranija.
Dan id-dibattitu sar ħamest ijiem qabel Clinton u Sanders jgħaddu mill-primarji li jmiss fi New Hampshire u li jsegwu dawk organizzati jiem ilu, fl-Istat ta’ Iowa. L-indikazzjonijiet mill-istħarriġ popolari huma li Sanders għandu vantaġġ tajjeb fi New Hampshire, li jmiss mal-Istat tiegħu (Vermont). Fl-istess ħin, l-istħarriġ qed juri li l-partitarji Demokratiċi huma ħafna aktar imħassbin dwar l-ekonomija milli dwar l-affarijiet internazzjonali.
Dawn il-primarji huma parti minn proċess li jinvolvi numru ta’ Stati Amerikani u li permezz tiegħu jintgħażel il-kandidat Demokratiku li se jikkuntesta għall-White House. Il-kandidat li jikseb in-nomina tal-Partit Demokratiku jikkonfronta lill-kandidat magħżul tal-Partit Repubblikan fl-elezzjoni għall-Presidenza tal-Istati Uniti li ssir fit-8 ta’ Novembru.
