Rapporti mil-Libja qalu li l-milizzji Libjani Iżlamiċi tilfu l-kontroll ta’ zoni importanti fil-belt ta’ Benghazi ‘fejn in-nies kienu qegħdin jiċċelebraw fit-toroq’.
Ir-rapporti qalu li ġellieda leali għall-Ġeneral Khalifa Haftar, magħruf bħala anti-Iżlamiku, ħadu kontroll tal-port u sptar ta’ Benghazi waqt li qatgħu l-aċċess minn rotta importanti għat-trasport ta’ armamenti.
Eluf ta’ nies ħarbu mill-inħawi ta’ Benghazi – fejn kienet żbruffat ir-rewwixta tal-2011 kontra l-eksreġim tad-dittatur Muammar Gaddafi — wara ‘l fuq minn sena ta’ ġlied fl-inħawi.
Il-Ġeneral Haftar kien membru tal-Armata Libjana u fiż-żmien partikolari kien iġġieled fuq in-naħa tal-gruppi armati li riedu jqaċċtu lil Gaddafi. Il-Libja llum saret Stat imfarrak li qed jegħreq fil-kaos u meta għandha żewġ Parlamenti rivali appoġġjati minn varjetà ta’ brigati u milizzji.
