Fil-jiem li ġejjin mistenni jkun ippubblikat ktieb dwar il-ħajja ta’ Sepp Blatter fi ħdan il-FIFA. Blatter ilu jaħdem mal-FIFA matul dawn l-aħħar 40 sena u fl-1998 kien elett President tal-Federazzjoni u minn dakinhar ‘l hawn baqa’ jokkupa dik il-kariga.
Il-ktieb se jkun jismu ‘Sepp Blatter: Mission Football’ u fih madwar 300 paġna li fihom se jkun hemm ħafna ritratti rari. L-awtur tal-ktieb hu l-kelliem ta’ Blatter, Thomas Renggli.
Ta min jiftakar li nhar il-Ġimgħa se jkun ifisser it-tmiem ta’ Blatter fi ħdan il-FIFA. Dan wara li Blatter, f’Mejju li għadda, ħabbar li kien se jirriżenja minn President tal-FIFA wara diversi akkużi ta’ korruzzjoni. Lejn tmiem is-sena li għaddiet Blatter, flimkien mal-istess Platini, President tal-UEFA, ġew sospiżi għal tmien snin wara li sar magħruf li fl-2011 Platini kien aċċetta pagament ta’ madwar 1.34 miljun lira sterlina mingħand Blatter għal xogħol li kien għamel Platini bejn Jannar tal-1999 u Ġunju tal-2002 meta dakinar il-Franċiż kien ‘konsulent speċjali’ ta’ Blatter.
