Is-sitcom (programm) popolari Are You Being Served se jirritorna fuq l-iscreens tat-televiżjoni fir-Renju Unit, proprju 30 sena wara li ntemmet is-sensiela oriġinali.
Dan il-programm hu wieħed speċjali u ta’ darba, waqt li hu bbażat fl-1988 u jkompli eżattament mill-punt tal-aħħar episodju fis-sensiela komika.
Are You Being Served jitratta l-avventuri jew misavventuri tal-ħaddiema ma’ stabbiliment (department store) fittizju ta’ Londra, bl-isem Grace Brothers.
Dan is-special għandu jinġibed ix-xahar id-dieħel quddiem udjenza fl-istudju tal-Media City, fil-belt ta’ Salford. L-episodju ġdid jixxandar aktar ‘il quddiem fis-sena fuq BBC One.
Il-kummiedja oriġinali ta’ Jeremy Lloyd u David Croft iddebuttat fl-1972 fuq BBC One u dam għal aktar minn għaxar snin. Intant, l-edizzjoni speċjali ta’ Are You Being Served se tinkiteb minn Derren Litten.
L-atturi jinkludu favoriti antiki flimkien ma’ uċuh ġodda fosthom Mathew Horne, Jason Watkins, John Challis, Sherrie Hewson, Jorgie Porter u Kayode Ewumi.
