Hekk kif Gyulchekhra Bobokulova ta’ 38 sena (ritratt) tressqet il-qorti f’Moska, investigaturi Russi qalu li kollox qed jindika li din kellha kompliċi.
Bobokulova kienet arrestata nhar it-Tnejn quddiem stazzjon tal-Metro f’Moska b’ras ta’ tifla ta’ tliet snin f’idejha. Tifla li kienet taħt il-kustodja tagħha peress li kienet tbati b’diżabbiltà.
Hekk kif iddaħħlet fl-awla tal-qorti Bobokulova għajtet għal diversi drabi “Allah hu l-Akbar” u m’għamlet ebda sforz biex tiċħad dak li wettqet. Hawn l-investigaturi qalu lill-qorti li kollox jidher li din kellha kompliċi u qed isir ħidma kbira biex jinstabu. Meta ġurnalisti barra l-awla qalulha għaliex għamlet dak li għamlet, hi wieġbet li “Allaħ qalli nagħmel hekk”.
Bobokulova, li hi mill-Uzbekistan, kienet ilha tieħu ħsieb it-tifla, identifikata biss bħala Nastya M, għal dawn l-aħħar 18-il xahar.
