Il-Ministru tal-Finanzi Ġermaniż, Wolfgang Schaeuble, wissa li l-UE tkun ‘anqas stabbli’ jekk ir-Renju Unit jivvota biex jitlaq minn dan il-grupp ta’ pajjiżi waqt ir-referendum ta’ Ġunju.
Schaeuble, li kien qed jitkellem f’Londra, waqt il-konferenza annwali tal-British Chambers of Commerce, qal li jekk ir-Renju Unit ma jkunx involut aktar fl-UE ‘hu jemmen fis-sogru li l-Ewropa kontinentali tkun anqas stabbli u aktar disposta għal sitwazzjonijiet estremi li jinbidlu f’daqqa’.
Meta staqsewh x’għandha tagħmel il-Ġermanja f’każ li r-Renju Unit, fit-23 ta’ Ġunju, jivvota biex joħroġ mill-UE, Schaeuble – li kien qed jitkellem fil-preżenza tal-Kanċillier tal-Finanzi Britanniku, George Osborne — wieġeb li ‘d-dispjaċir ikun kbir’ u esprima tama li ‘dan ma jkunx il-każ’.
Min-naħa tiegħu, George Osborne ikkritika ‘il-konfużjoni dwar x’għandu jkun l-istatus tar-Renju Unit barra l-UE’ li qegħdin jiġġeneraw dawk l-elementi li jridu li r-Renju Unit jispiċċa minn mal-grupp ta’ 28 Stat.
