Illum tista’ tkun ġurnata importanti fl-istorja tal-futbol hekk kif f’Wales qed jiltaqa’ l-Bord Internazzjonali li ġie msejjaħ biex jiddeċiedi dwar l-użu tar-replay fil-grawnd b’esperiment li jista’ jibda mill-istaġun li ġej. Is-sitwazzjonijiet li hemm possibiltà li fihom ir-referees jistgħu jaraw ir-replay huma tlieta; biex jiddeċiedi penalty, tkeċċija diretta jew dwar regolarità ta’ gowl (biex jaraw jekk kienx hemm fawl, jekk il-ballun ikunx qabeż il-linja jew plejer kienx offside). Biex ikun hemm l-approvazzjoni hemm bżonn 6 voti minn 8 b’erba’ komponenti mill-FIFA inkluż il-President Gianni Infantino u 4 mill-federazzjonijiet Brittaniċi.
REGOLI ĠODDA – Teżisti possibilità li jkun hemm bdil ta’ regoli u hu propost li dawn ir-regoli jidħlu fis-seħħ:
-Għal fawls meta plejer imiss il-ballun b’idu hu propost li ma jkunx hemm id-diskors dwar il-volontarjetà u l-ammonizzjoni awtomatika, li jseħħ biss jekk plejer iwaqqaf azzjoni perikoluża.
-Tiġi introdotta r-regola tal-vantaġġ anki wara fawls ta’ karti ħomor.
-Min isofri fawl ta’ karta safra jew ħamra m’għandux għalfejn joħroġ mill-grawnd wara li jiġi kkurat sakemm ma jdumx aktar minn minuta.
-Tkeċċija qabel ma tibda l-partita għal inċidenti qabel il-partita.
-Fawl jew penalty (jekk fil-kaxxa) kontra għal min ifittex li jdum apposta biex l-avversarju jidħol lura fil-pitch jew jekk mediku jew membru tal-bankina jidħol fil-pitch mingħajr awtorizzazzjoni.
-Titneħħa dik li tissejjaħ is-sanzjoni tripla li hi penalty, tkeċċija jew skwalifika f’każi ta’ fawls mhux vjolenti, bħal eżempju meta l-gowlkipers joħorġu.
-Ir-raba’ sostituzzjoni fil-ħin barrani kif ukoll l-introduzzjoni tat-tkeċċija ta’ 10 minuti għal min jipprotesta, jipprova jgħarraq jew ikollu komportament antisportiv.
