Il-Mexxejja tal-UE u t-Turkija qed jiltaqgħu fi Brussell f’mument deċiżiv għall-isforzi tal-Ewropa biex tikkontrolla l-kriżi tal-immigranti.
Il-Mexxejja se wżaw dan is-summit biex iħeġġu għal impenn akbar mit-Turkija bl-iskop li l-immigranti u r-refuġjati ma jissugrawx aktar ħajjithom fi vjaġġi perikolużi mit-Turkija lejn il-Greċja. Intant, il-Kanċillier tal-Ġermanja, Angela Merkel, qalet, mal-wasla fi Brussell, li kienet qed tistenna negozjati diffiċli.
Saru diġà numru ta’ vjaġġi fatali fil-Baħar Eġew, waqt li bejn 1,000 u 2,000 persuna qed jaslu, kuljum, fix-xatt tal-Greċja. Fil-preżent hemm ’l fuq minn 35,000 immigrant u refuġjati maqbudin fil-Greċja, fejn ma jistgħux jivvjaġġaw lejn iz-zoni Ewropej tat-Tramuntana minħabba l-għeluq tal-fruntieri.
Hemm ukoll tamiet li t-Turkija tieħu lura immigranti – fosthom Marokkini u Pakistani – li ma jikkwalifikawx għal kenn politiku fl-Ewropa. Ftit tal-jiem ilu, ’il fuq minn 300 persuna ntbagħtu lura t-Turkija mill-Greċja, bl-uffiċjali tal-UE jgħidu li dan kien il-bidu ta’ programm ‘għar-ritorn ta’ immigranti (lejn it-Turkija) fuq skala akbar’.
Il-Mexxejja tal-UE, permezz tas-summit, iddikjaraw ir-rotta mill-punent tal-Balkani ‘magħluqa’, avolja l-maġġoranza assoluta tar-refuġjati u immigranti fil-Greċja huma diġà pprojbiti milli jivvjaġġaw minn dik ir-rotta lejn il-Ġermanja u Stati Ewropej oħrajn. Dan meta l-UE qed timpenja ruħha biex ‘tappoġġja lill-Greċja f’dan il-mument diffiċli u tagħmel li tista’ biex tikkontrolla s-sitwazzjoni’.
Is-summit fi Brussell ikkonċentra fuq inizjattivi li jixprunaw il-ħidma lejn pjan għal azzjoni konġunta li, is-sena l-oħra, kienet miftehma mat-Turkija bl-iskop li r-refuġjati jinżammu barra l-Ewropa. L-UE impenjat tliet biljun ewro biex tgħin titma u tipprovdi kenn lill-kważi tliet miljun refuġjati residenti fit-Turkija, u biex tnaqqas ir-restrizzjonijiet tal-visa għal 75 miljun Tork.
L-UE impenjat ruħha wkoll li tagħti nifs ġdid lit-taħditiet (li ilhom staġnati) għas-sħubija tat-Turkija fl-Unjoni, waqt li t-Torok wiegħdu biex jieħdu azzjoni fil-konfront tat-traffikanti tal-immigranti u jrażżnu l-mewġa ta’ persuni li qed jivvjaġġaw lejn l-Ewropa.
Intant, uffiċjali tal-UE llum qed jitilfu s-sabar minħabba li t-Turkija ma naqqsitx dawn il-vjaġġi tal-immigranti.
