Bejn il-5 u 7 ta’ Marzu, 23 għawwiem min-Nursery ta’ Sirens ASC ħadu sehem f’ISM Meet f’Berlin flimkien ma’ 106 timijiet oħra ġejjin minn 27 pajjiż differenti. Dan l-International Swimming Meet ta’ livell Olimpiku rikonoxxut mill-FINA inżamm fuq jumejn fil-famuż Europasportpark. 1400 atleta u għadd sabiħ ta’ kowċis, ġenituri u spettaturi ħolqu atmosfera kompetittiva li għenet ħafna biex l-għawwiema Maltin imorru tajjeb.
L-ewwel mill-Maltin li ħalliet impressjoni tajba kienet Emily Grech Carr, ta’ 11-il sena, li qaċċtet 4 sekondi mill-ħin personali tagħha meta għamlet il-50m Butterfly fi 39.28. Kien imiss imbagħad lil Kyra Debono, Jessica Powell u Sasha Gatt li lkoll marru tajjeb ħafna.
Is-subien ukoll kellhom ħinijiet tajbin. Benjamin Scerri, Matthew Zammit, Andrea Mallia u Rudi Spiteri lkoll tejbu l-ħinijiet personali tagħhom. Mhux hekk biss iżda Spiteri u Mallia spiċċaw l-ewwel fil-heats rispettivi tagħhom.
Fit-tieni jum kien imiss lil Leah Tanti li tikseb suċċess. Fil-50m Freestyle kellha ħin ta’ 29.80 biex imbagħad għamlet il-50m Breaststroke fi 36.00, tejbet il-ħin personali u kisbet post fil-finali tal-age group tagħha. Jeremy Bugeja fil-50m Freestyle u Michael Umnov fil-100m Butterfly ukoll daħlu għall-finali.
Fil-finali għall-bniet 2003 Leah Tanti spiċċat fid-9 post mal-aqwa għawwiema tal-Ewropa. Jeremy Bugeja ukoll spiċċa fid-9 post b’ħin ta’ 25.65 filwaqt li Michael Umnov kiseb it-8 post f’tiġrija li kellu jikkompeti miegħu lil Lazlo Czech għawwiem Olimpiku Ungeriż.
Benjamin Scerri, ta’ 12-il sena kellu inċident memorabbli. Ft-tiġrija tal-100m Freestyle kien innotat tluq difettuż u t-tellieqa kellha terġa’ tibda mill-ġdid. Benjamin ma ntebaħx b’dan u għam id-distanza kollha waħdu fost iċ-ċapċip u l-ammirazzjoni ta’ kulħadd. Żgur li jibqa’ jiftakarha għax dakinhar naqqas l-aħjar ħin personali tiegħu b’4 sekondi!
Dawn huma l-kummenti tal-Head Coach ta’ Sirens Daniela Deguara Gatt: “L-għawwiema kollha marru tajjeb ħafna. Kollha kemm huma. U dan meta kellna tnejn li xejn ma kienu f’sikkithom u riedu jikkompetu. M’hemmx iktar xi ngħid. Ilkoll kemm aħna bqajna impressjonati bid-dedikazzjoni u d-determinazzjoni tagħhom u meta tieħu inkonsiderazzjoni il-kobor u l-livell ta’ dan il-meet ma tistax ma tħossokx kburi bl-atleti żgħar tagħna.’
