Tkompli t-tellieqa taħraq tal-Presidenza Amerikana hekk kif ikomplu l-elezzjonijiet fid-diversi stati fil-proċess li jwassal sabiex iż-żewġ partiti prinċipali jagħżlu l-kandidat tagħhom għal Presidenza.
Fit-tellieqa tad-Demokratiċi fl-aħħar minn sensiela ta’ attakki s-Senatur ta’ Vermont Bernie Sanders akkuża lil Hillary Clinton li hija dipendenti mill-kumpaniji taż-żejt għal kampanja Presidenzjali tagħha. Huwa akkuża lil Clinton li rċeviet aktar minn erbgħa miljun Dollaru f’donazzjonijiet minn dawn il-kumpaniji.
Clinton minn naħa l-oħra saħqet li Sanders kien qiegħed jigdeb. F’diskors attakkat ukoll lil kandidat Repubblikan Donald Trump fejn sostniet li dan mhuwiex jifhem il-pjan tagħha sabiex tiġġieled lill-ISIS.
Minn naħa tiegħu l-kandidat tar-Repubblikani Donald Trump iddeskriva lin-NATO bħala xi ħaġa skaduta. Trump ikkritika lill-allejati fi ħdan in-NATO u akkużhom li dawn ma’ kienux qegħdin jerfgħu il-piż tagħhom.
Il-kampanja tal-Partit Repubblikan qed tara wkoll kampanja qalila minn Ted Cruz u John Kasich kontra xulxin u kontra Donald Trump.
