Fl-istess jum illi fih eluf inġabru quddiem Kastilja biex isemmgħu leħinhom fi protesta nazzjonali kontra l-korruzzjoni, il-Prim Ministru Joseph Muscat ħalla Malta biex jibda żjara fil-Ġordan. Dan il-pajjiż huwa wieħed minn dawk li jissemmew fl-iskandlu Panama Papers.
Id-dokumenti tal-ICIJ żvelaw illi l-eks Prim Ministru tal-Ġordan Ali Abu al-Ragheb (ritratt) għandu diversi kumpaniji reġistrati fil-British Virgin Islands u s-Seychelles.
Il-kumpanija fil-British Virgin Islands li isimha joħroġ mill-Panama Papers huwa Jaar Investment Ltd.
Skont rapporti li ħarġu fil-media Għarbija jirriżulta li diġa’ kien hemm pressjoni fuq l-eks Prim Ministru tal-Ġordan minn xi ġurnalisti li provaw jagħmlu domandi lilu dwar dawn il-kumpaniji offshore ħmistax qabel ħarġu l-Panama Papers. Ali Abu al-Ragheb qed jgħid li fit-twaqqif ta’ dawn il-kumpaniji m’hemm xejn illegali.
Intant, fid-delegazzjoni li marret il-Ġordan mal-Prim Ministru hemm ukoll il-Ministru Chris Cardona illi lbieraħ fil-Konferenza Laburista saħaq li jekk “il-PN isaawwat lil xi wieħed minnha bis-sejf, se nsawtukom lura bil-mannara”.
