Il-Kumpless tan-Nar San Ġużepp ta’ Ħaż Żebbuġ hu r-rebbieħ tal-għaxar edizzjoni tal-festival tan-nar tal-Art li sar nhar is-Sibt li għadda Fuq il-Fosos tal-Furjana.
Dan il-festival sar ukoll bħala parti mill-Festa ta’ San Publiju, li kienet iċċelebrata fi tmiem il-ġimgħa li għadda.
Minbarra r-rebbieħa ewlenin tal-festival, l-organizzaturi ħasbu biex ikun hemm rebbieħa f’kategoriji differenti.
Il-Kategorija għall-ahjar mekkaniżmu, intrebħet mill-istess Kumpless tan-Nar rebbieħ tal-Festival jiġifieri l-Kumpless tan-Nar San Ġużepp ta’ Haż Żebbuġ. Il-Kategorija għall-aħjar prodotti wżati, ntrebħet mill-Kumpless tan-Nar San Bartilmew ta’ Ħal Għargħur, filwaqt li l-Kategorija għall-oriġinalità fid-disinji u movimenti, ntrebħet ukoll mill-Kumpless tan-Nar rebbieħ tal-Festival.
Il-premju għall-ahjar xogħol pirotekniku skont l-opinjoni pubblika permezz tal-SMS’s intrebaħ mill-Kumpless tan-Nar San Leonardu ta’ Ħal Kirkop.
Il-ġurija kienet magħmula minn tlett pirotekniċi internazzjonali mill-Olanda, l-Ġermanja u r-Renju Unit, filwaqt li ċ-Chairman kien is-Sur Michael Brockdorff. Il-ġurija evalwat x-xogħlijiet tan-nar waqt l-armar, waqt il-ħruq u anke permezz ta’ filmati.
