Wara l-informazzjoni straordinarja li ħarġet mill-Panama Papers u l-iskandlu internazzjonali li ħasad anke lil Malta, il-Grupp tas-Soċjalisti Ewropej ħabbar illi se jitlob li jitwaqqaf kumitat ta’ inkjesta fi ħdan il-Parlament Ewropew.
Waqt konferenza tal-aħbarijiet fi Strasburgu, il-Kap tas-Soċjalisti Gianni Pitella qal li se jkun qed iressaq din il-proposta waqt il-laqgħa li jmiss tal-Kapijiet tal-Gruppi politiċi rispettivi.
“Quddiem dan l-iskandlu għandna nimxu b’tolleranza żero”, sostna Pitella.
Is-Soċjalisti Ewropej qed jitolbu li postijiet bħall-Panama fejn issir evazjoni tat-taxxa jiġu blacklisted. Pitella saħaq illi hemm bżonn jiddaħħlu sanzjonijiet kontra min qed jgħin lil nies sinjuri ipoġġu flushom f’dawn il-pajjiżi.
“Din hija battalja favur il-ġustizzja”, sostna l-Kap tas-Soċjalisti Ewropej.
