Il-Pulizija f’Panama wettqu rejd fil-kwartier-ġenerali tal-kumpanija legali Mossack Fonseca, li tinsab f’nofs l-iskandlu tal-Panama Papers. Dan hekk kif l-investigaturi qed ilestu biex jiltaqgħu f’Pariġi biex jikkoordinaw il-ħidma kontra l-evażjoni tat-taxxa b’rabta ma’ dak li qed jinkixef fil-Panama Papers, dokumenti li jkopru għexieren ta’ snin tal-kumpanija Mossack Fonseca.
Skont l-Avukat Ġenerali tal-Panama, ir-rejd sar bħala parti minn investigazzjoni f’attività illegali mill-Mossack Fonseca u r-rejd tmexxa minn Javier Caravallo, prosekutur speċjalizzat fl-investigazzjonijiet dwar il-kriminalità organizzata u l-ħasil tal-flus.
Il- Mossack Fonseca qed tinsisti li m’għamlet xejn ħażin u kull ma kienet tagħmel kien li toħloq kont finanzjarju offshore u kumpaniji anonimi, dawk magħrufa bħala ‘anonymous shell companies’, għall-klijenti, u ma kinitx imdaħħla f’kif dawk il-kontijiet kienu jintużaw.
Il-Mossack Fonseca hi r-raba’ l-akbar kumpanija legali speċjalizzata fil-liġi offshore fid-dinja.
Il-Ħamis, f’Pariġi, Franza se jiltaqgħu l-uffiċjali mill-awtorità tat-taxxa ta’ pajjiżi ewlenin biex jiddiskutu l-Panama Papers u jippruvaw ifasslu strateġija globali kontra dawk li jużaw kontijiet sigrieti biex jevadu t-taxxa. Il-ħidma qed tkun immexxija mill-Joint International Tax Shelter Information and Collaboration (Jitsic) Network.
