Il-kantant popolari Amerikan Prince kellu l-katavru tiegħu kremat f’ċerimonja privata ta’ madwar 1,600 dollaru li kienet organizzata minn oħtu.
Il-funeral sar f’bini madwar pompa tal-petrol tul triq ewlenija fil-periferiji ta’ Minneapolis, il-belt fejn twieled u miet. Ċerimonja li kienet organizzata minn oħtu Tyka Nelson, l-uniku membru tal-familja tiegħu li hi ħajja. Ċerimonja li għaliha attendew ftit nies li kienu qrib tiegħu.
Issa kollox qed jindika li Tyka aktarx tiret il-ġid ta’ Prince li hu stmat madwar 400 miljun dollaru.
Prince, li miet il-Ħamis li għadda fl-età ta’ 57 sena, kien divorzjat darbtejn imma ma kellux tfal. L-uniku wild li kellu kien miet ġimgħa wara t-twelid.
Skont il-liġi ta’ Minnesota, jekk ma għamilx testment fejn jispeċifika xi rid li jsir bil-ġid tiegħu, dan kollu jmur għand il-membri tal-familja u f’dan il-każ Tyka Nelson.
Tyka Nelson, li għandha 55 sena, kienet tbiegħdet minn ħuha u kellha problemi kbar bid-droga, imma Prince kien stinka biex hi tagħmel programm ta’ riabilitazzjoni u issa saret Nisranija devota.
Iżda hemm spekulazzjoni li hu seta’ ħalla xi wirt lill-Jehovah’s Witnesses li magħhom kien issieħeb fl-2001 u li kien jaħdem ħafna għalihom.
Apparti minn hekk hu mifhum li Prince kien jirrekordja ħafna kanzunetti li qatt ma saru pubbliċi u dawn kienu jitqiesu bħala minjiera tad-deheb tul ħajtu u issa iżjed li hu mejjet. Imma Prince kien bniedem riservat ħafna u li kien jobgħod il-kummerċjalizzazzjoni tal-mużika tiegħu.
S’issa m’hemmx ħjiel dwar x’wassal għall-mewt tiegħu. Is-suwiċidju qed ikun eskluż u anki li nqatel. Uffiċjali Amerikani qalu li jridu jgħaddu tal-anqas erba’ ġimgħat sakemm tkun magħrufa l-kawża minħabba t-testijiet li jridu jsiru.
