Hekk kif ix-xahar id-dieħel se jsir ir-referendum fir-Renju Unit, imlaqqam Brexit, dwar jekk il-pajjiż għandux jibqa’ membru tal-Unjoni Ewropea, u l-istħarriġ tal-opinjoni pubblika qed juri li l-elettorat hu kważi maqsum indaqs, il-Prim Ministru David Cameron għamel appell ieħor favur is-sħubija
Waqt diskors fil-British Museum f’Londra, Cameron wissa vot biex ir-Renju Unit joħroġ mill-UE kien se jipperikola l-paċi fl-Ewropa u kull darba li r-Renju Unit tat daharha lill-Ewropa, kif turi l-istorja ftit wara jiddispjaċiha. Hu qal li l-perikli bit-tluq mill-UE kienu ferm kbar biex wieħed jissograhom.
Cameron qal li kull darba li r-Renju Unit iżolat ruħha dejjem iddispjaċiha.
Cameron, minkejja t-twissija li għamel, qal li jemmen li d-deċiżjoni li jsejjaħ referendum kienet waħda tajba għax ma jemminx li wieħed kellu jżomm nazzjon sovran u indipendenti f’għaqda kontra r-rieda tal-poplu.
Ir-referendum se jsir fit-23 ta’ Ġunju u kienet wegħda elettorali ta’ Cameron.
