Żewġ biċċiet ta’ ajruplan li nstabu fuq bajjiet fl-Afrika t’Isfel u l-Mauritius kważi ċertament ġejjin mit-Titjira MH370 tal-Malasian Airlines, li ilha nieqsa mindu l-ajruplan inkwistjoni għeb waqt titjira mill-Malasja lejn iċ-Ċina, f’Marzu tal-2014.
Dan hu l-aħħar żvilupp fil-misteru dwar l-ajruplan li kienu qed jivvjaġġaw fuqu 239 persuna u li kien qed itir minn Kuala Lumpur għal Beijing. Ħafna jaħsbu li l-ajruplan iġġarraf fl-Oċean Indjan wara li ħareġ mir-rotta maħsuba. Fil-preżent, numru ta’ bastimenti qed ifittxu għalih f’zona ta’ oċean li tkopri madwar 120,000 kilometri kwadri.
Talanqas ħames elementi, issa, huma kkonfermati bħala partijiet ‘definittivi’ jew ‘probabbli’ tal-ajruplan partikulari. Kull parti nstabet eluf ta’ mili ’il bogħod mis-search area indikata.
Il-fdalijiet kollha qegħdin ikunu eżaminati fl-Awstralja mill-Australian Transport Safety Bureau (ATSB) u esperti oħra. Intant, il-Ministru tat-Trasport Malasjan, Liow Tiong Lai, tenna li ż-żewġ biċċiet tal-ajruplan li nstabu fl-Afrika t’Isfel u fl-inħawi tal-Gżira ta’ Rodrigues ‘huma kważi ċertament tat-Titjira MH370’.
