Kumitat tal-Parlament fir-Renju Unit qal li l-missjoni navali tal-Unjoni Ewropea li qed tikkonfronta lit-traffikanti tan-nies fil-Mediterran naqset, s’issa, milli tilħaq l-għanijiet.
L-EU Committee tal-House of Lords, permezz tar-rapport, qal li Operation Sophia ‘mhix tostakola lid-dgħajjes u l-bastimenti tat-traffikanti b’xi mod sinifikanti’. Id-dokument tenna wkoll li l-qerda tad-dgħajjes tal-injam ġiegħlet lit-traffikanti tal-bnedmin jużaw id-dinghies tal-gomma, b’sogru akbar għall-immigranti li jippruvaw jaqsmu l-Mediterran.
Operation Sophia bdiet f’Ġunju tal-2015 waqt li l-gwerer fis-Sirja u l-Iraq xprunaw mewġa bla preċedent ta’ refuġjati mil-Lvant Nofsani lejn l-Ewropa. Iżda l-maġġoranza tal-immigranti li qed jitilqu mil-Libja ġejjin mill-pajjiżi Afrikani ta’ taħt is-Sahara.
Il-missjoni navali tal-UE bdiet wara sensiela ta’ traġedji fejn għerqu l-mijiet tal-immigranti huma u jippruvaw jaqsmu mil-Libja għall-Italja.
Intant, żdiedu l-immigranti li qed jissugraw ħajjithom biex jivvjaġġaw mir-rotta bejn il-Libja u l-Italja, meta naqsu l-immigranti u r-refuġjati li qed jaslu fil-gżejjer Griegi mit-Turkija. Ftehim bejn l-UE u t-Turkija biex id-dgħajjes tal-immigranti jkunu interċettati fil-Baħar Eġew u jintbagħtu lura l-immigranti, ilu fis-seħħ minn Marzu.
L-UE, is-sena l-oħra, awtorizzat il-bastimenti tagħha biex jitilgħu u jfittxu fuq opri tal-baħar suspettati li qed jintużaw għal traffikar ta’ persuni fiċ-ċentru tal-Mediterran. Il-bastimenti huma anki awtorizzati biex jaħtfu dawk l-opri tal-baħar f’każ li neċessarju.
Iżda r-rapport tal-House of Lords qed jgħid li l-arresti li saru s’issa kienu ta’ ‘livell baxx’, meta l-qerda tad-dgħajjes tal-injam irriżultat f’bidla ta’ tattiċi mit-traffikanti tal-bnedmin li, issa, qed jużaw id-dinghies bħala mezz ta’ trasport ‘aktar perikoluż’.
Ir-rapport ikompli li jeżistu wkoll ‘limiti sinifikattivi għall-informazzjoni sigrieta li tista’ tinġabar’ dwar in-networks tat-traffikanti li qed imexxu dawn il-vjaġġi fuq il-baħar. Id-dokument, intant, jikkonkludi li, b’hekk, ‘ftit hemm prospetti li Operation Sophia jirnexxilha tkisser il-mudell, jew bażi, attwali ta’ dan it-tip ta’ traffikar’.
Ir-rapport, fl-istess ħin, jagħmilha ċara li l-missjoni tal-UE għadha titmexxa f’ibħra internazzjonali u mhux fl-ibħra tal-Libja, bħalma kienet l-intenzjoni oriġinali.
