L-Istati Uniti u potenzi oħra tad-dinja qalu li lesti jgħinu lill-Gvern Libjan għall-għaqda nazzjonali jarma biex ikun jista’ jikkumbatti lit-terroristi tal-Istat Iżlamiku fil-Libja.
Meta tkellem fl-Awstrija, is-Segretarju tal-Istat Amerikan John Kerry qal li l-potenzi għandhom jappoġġjaw lil-Libja biex tkun eżenti minn embargo tal-armi, stabbilita min-Nazzjonijiet Uniti.
Kerry għamilha ċara li l-ISIS hu theddida ġdida għal-Libja, filwaqt li nsista li t-terroristi jridu jkunu kkontrollati. Il-Gvern għall-għaqda nazzjonali fil-Libja diġà wissa li l-ISIS jista’ jaħtaf il-parti l-kbira tal-pajjiż jekk ma jwaqqfuhx.
Fi kliem Kerry, dan il-Gvern hu l-uniku mezz li jista’ jgħaqqad lil-Libjani biex flimkien jegħlbu lill-Istat Iżlamiku.
