LIVERPOOL……………1
SEVILLA………………….3
Sevilla wettqu rimonta mill-aqwa u għelbu lil Liverpool bi skor ta’ 3-1 biex b’hekk rebħu l-Europa League għat-tielet darba konsekuttiva u l-ħames darba fl-istorja tagħhom. Il-logħba f’St. Jakob-Park f’Basel fl-Iżvizzera kienet waħda eċċitanti u mimlija emozzjonijiet fejn fl-ewwel taqisma Liverpool kienu dominanti imma fit-tieni taqsima sfaxxaw għal kollox u ħallew lill-avversarji tagħhom jiskurjaw tliet gowls.
Sevilla bdew tajjeb u għall-ewwel ħames minuti kienu huma li bdew jattakkaw iżda minn hemm ‘il quddiem ir-Reds, li kienu mingħajr il-captain Jordan Henderson, bdew jiddettaw il-logħob u baqgħu jagħmlu dan sa tmiem l-ewwel tasqima.
Fit-tmien minuta Liverpool kellhom l-ewwel ċans meta Emre Can ra x-xutt tiegħu jkun salvat mill-gowlkiper David Soria. Kien fil-35 minuta meta Liverpool fetħu l-iskor meta Coutinho qassam lejn Daniel STURRIDGE li minn tarf il-kaxxa l-kbira skurja ġmiel ta’ gowl b’xutt bid-dawra. Għal Sturridge dan kien it-tielet gowl fl-Europa League.
Wara dan il-gowl Liverpool baqgħu jattakkaw u tliet minuti wara ngħataw corner li minnu Lovren sab ix-xibka b’daqqa ta’ ras imma l-gowl tħassar minħabba li Sturridge kien f’pożizzjoni ta’ offside.
Għaddew ftit sekondi mill-bidu tat-tieni taqsima u Sevilla ġabu d-draw. Ferreira qabeż żewġ difensuri u qassam lejn GAMEIRO li mill-viċin poġġa l-ballun fix-xibka. Mas-siegħa logħob Sevilla setgħu reġgħu marru fil-vantaġġ imma Mignolet għamel save kbir fuq Gameiro.
Madankollu l-Ispanjoli ftit damu jistennew biex eventwalment skurjaw ieħor għax erba’ minuti wara kien COKE li għeleb lil Mignolet b’xutt bid-dawra minn barra l-kaxxa.
Minn hawn ‘il quddiem Sevilla, grazzi għall-esperjenza li għandhom f’din il-kompetizzjoni, iddefendew tajjeb sat-tmiem.
Grazzi għal dan is-suċċess Sevilla issa huma l-aktar tim li rebħu din il-kompetizzjoni, total ta’ ħames darbiet filwaqt li Liverpool ġew imċaħħda milli jirbħu din it-tazza għar-raba’ darba.
Barra minn hekk, b’din ir-rebħa Sevilla se jikkwalifikaw b’mod awtomatiku għall-fażi tal-gruppi taċ-Champions League u f’Awwissu li ġej se jilagħbu fil-finali tal-UEFA Super Cup kontra r-rebbieħ taċ-Champions League, jiġifieri Real Madrid jew Atletico Madrid. Sevilla jistgħu jirbħu unur ieħor fi spazju ta’ ftit jiem hekk kif nhar il-Ħadd li ġej imisshom jilagħbu kontra Barcelona fil-finali tat-Tazza tar-Re.
Il-manager ta’ Liverpool Jurgen Klopp ġie wkoll imċaħħad milli jirbaħ l-ewwel unur tiegħu fl-ewwel staġun ma’ dan il-klabb wara li kien ħa post Brendan Rodgers.
Ta min jinnota wkoll li din hi l-ewwel darba fl-istorja li Liverpool ħarġu telliefa f’finali ta’ din il-kompetizzjoni.
