Bil-voti li ntbagħtu bil-posta nbidel ir-riżultat fl-elezzjoni Presidenżjali Awstrjaka biex il-kandidat estremista tal-lemin Norbert Hofer ħareġ tellief u l-kandidat indipendenti Alexander Van der Bellen kien elett President.
Il-voti li ntbagħtu bil-posta kienu jammontaw għal madwar 14 fil-mija ta’ dawk eleġibbli għall-vot. Dan f’elezzjoni li fiha mar jivvota 71 fil-mija tal-elettorat fl-Awstrija – pajjiż ta’ 8.5 miljun persuna .
Qabel l-għadd tal-voti li ntbagħtu bil-posta, ir-riżultat temporanji wrew lil Hofer bi 51.9 fil-mija tal-voti u Van der Bellen bi 48.1 fil-mija tal-voti
Imma minkejja li Van der Bellen ħareġ rebbieħ, ħafna osservaturi qalu li r-riżultat kien wieħed xokkanti meta jqies li nofs il-poplu Awstrijak kien lest jivvota għal kandidat estremista għall-kariga ta’ President tal-pajjiż u li din għandha sservi bħala sinjal ta’ twissija għall-partiti politiċi fl-Awstrija.
Kieku kien elett, Hofer kien se jkun l-ewwel kap tal-Istat ta’ pajjiż tal-Unjoni Ewropea ġej minn partit estremista, il-Partit tal-Liberta.
Il-kampanja elettorali Awstrijaka kienet dominata mill-kriżi tal-immigrazzjoni u fl-ewwel fażi tal-elezzjoni Hofer spiċċa bl-akbar ammont ta’ voti.
