Il-Ġimgħa Barack Obama sar l-ewwel President Amerikan biex żar Hiroshima, fil-Ġappun – il-post fejn kienet intużat l-ewwel bomba atomika u mar jagħti qima lill-vittmi tal-attakk li kien sar fis-6 ta’ Awwissu tal-1945.
Obama qal li l-memorja ta’ Hiroshima m’għandha qatt titħalla tmut, iżda hu ma talabx apoloġija għal dik l-azzjoni militari ta’ pajjiżu li tibqa’ mniżżla fl-istorja
Obama poġġa kuruna għal dawk kollha li ‘nqatlu fit-Tieni Gwerra Dinjija u f’diskors li għamel ħeġġeġ biex jiżdiedu l-impennji internazzjonali biex id-dinja tkun verament ħielsa mill-armi nukleari.
Aktar tard Obama iltaqa’ fil-privat ma’ nies li għaddew minn dak il-bumbardament ta’ 71 sena ilu.
L-attakk ikien tmexxa mill-qawwiet tal-ajru Amerikani, u waqt li mietu almenu 140,000 fl-attakk fuq Hiroshima, waqt li – tlett ijiem wara l-isplużjoni nukleari – madwar 74,000 oħra spiċċaw jitilfu ħajjithom meta ntefgħet tieni bomba atomika fuq il-belt Ġappuniża ta’ Nagasaki.
Il-President tal-Istati Uniti, imbagħad, tkellem ma’ żewġ persuni – Shigeaki Mori, ta’ 79 sena u Sunao Tsuboi, ta’ 91 sena – li kienu salvaw mill-attakk fuq Hiroshima. Id-dehra ta’ Obama jgħannaq lil dawn l-anzjani kienet waħda kommoventi ferm għall-poplu Ġappuniż, bl-istħarriġ tal-opinjoni jindika li l-maġġoranza tal-Ġappuniżi huma kuntenti biż-żjara tal-President Amerikan waqt li mhumiex urtati ‘dwar in-nuqqas ta’ apoloġija’.
