Il-Pulizija Iżraeljana hi tal-opinjoni li jitressqu akkużi kriminali kontra l-mara tal-Prim Ministru Iżraeljan, Benjamin Netanyahu, dwar allegat użu ħażin u mhux xieraq ta’ fondi pubbliċi għar-residenzi uffiċjali u privati ta’ din il-koppja.
Sara Netanyahu s-sena l-oħra kienet interrogata mill-pulizija b’konnessjoni ma’ investigazzjoni dwar fondi tal-Istat li kienu tħallsu lil persuna li kienet qed tieħu ħsieb lil missierha qabel mewtu.
Issa s-suspetti huma dwar fondi li ntefqu fuq tiswijiet fil-villa privata tal-koppja Netanyahu li tinsab fir-resort ta’ Caesarea, qrib il-kosta. Dan apparti akkużi li wżat fondi pubbliċi biex ħalset għal riċevimenti privati.
