Il-katavri ta’ mill-anqas 25 immigrant li għerqu waqt vjaġġ fil-Mediterran instabu fuq bajja, qrib il-belt ta’ Zuwara, lejn il-Punent tal-Libja.
Dan kien ikkonfermat minn uffiċjali tar-Red Crescent, il-fergħa Iżlamika tas-Salib l-Aħmar, wara li, fl-aħħar jiem, mijiet ta’ immigranti tilfu ħajjithom f’sensiela ta’ traġedji fuq il-baħar.
L-uffiċjali tar-Red Crescent qalu li l-ħaddiema tagħhom, kienu għadhom qed jirkupraw il-katavri mill-bajja fil-limiti ta’ Zuwara. Sar magħruf ukoll li ħafna mill-vittmi kienu nisa u li ‘ma kenux ċari’ iċ-ċirkustanzi tal-mewt f’din is-sitwazzjoni.
Kelliema għall-gwardjani tal-kosta fi Tripli qalu li l-ebda dgħajjes mimlijin bl-immigranti ma kienu interċettati fl-aħħar jiem. Dan waqt li ma setgħux isiru l-patrols effettivi ta’ zoni speċifiċi b’kaġun tal-ibħra mqallbin.
S’issa, din is-sena, ’il fuq minn 40,000 immigrant qasmu l-Mediterran, mill-Afrika ta’ Fuq, lejn l-Italja, fejn kellhom iħallsu lit-traffikanti tal-bnedmin għall-vjaġġi.
