Ir-Reġina Eliżabetta II qed tiċċelebra għeluq id-90 sena tagħha b’mod uffiċjali, fost sensiela ta’ festi li huma mqassmin fuq tlett ijiem.
Għeluq snin ir-Reġina hu avveniment ta’ tliet xhur li jibda fil-jum proprju ta’ April, meta hi tagħlaq sninha. Hi tradizzjoni li l-avveniment uffiċjali, fil-każ ta’ Kap tal-Monarkija, ikun iċċelebrat f’Ġunju, meta t-temp ta’ Londra jkun aktar favorevoli.
Intant, ir-Reġina Eliżabetta u żewġha, il-Prinċep Philip, il-Ġimgħa attendew servizz ta’ radd il-ħajr f’St Paul’s Cathedral, f’Londra. Dan fl-okkażjoni ta’ għeluq sninha kif ukoll għall-okkażjoni ta’ għeluq il-95 sena tad-Duka ta’ Edinburgh.
Is-Sibt, waqt l-avveniment uffiċjali ta’ għeluq snin ir-Reġina, issir il-parata tradizzjonali Trooping the Color f’Londra, fejn mistennija folol kbar ta’ Britanniċi u turisti fiż-żona tal-Palazz ta’ Buckingham. Dan meta mhix eskluża dehra tal-membri ewlenin tal-Familja Rjali fuq il-gallarija tal-palazz.
Il-Ħadd, tkun organizzata ikla, f’The Mall (quddiem il-palazz), għal mijiet ta’ ħaddiema li jaħdmu għall-karità u li għaliha se jattendu wkoll il-membri tal-Familja Rjali.
