Il-maltemp qalil kompla jassedja numru ta’ pajjiżi u reġjuni tal-Ewropa anki waqt li naqas l-għargħar fi Franza u l-Ġermanja.
Fil-belt ta’ Genappe, fil-Belġju, il-maltemp wassal għal għargħar bit-tajn li mela t-toroq u wettaq ħsarat lill-karozzi. Ir-rapporti rriferew ukoll ‘għall-ħsarat ikkaġunati mis-sajjetti’ f’numru ta’ pajjiżi meta ntlemaħ anki tornado fuq il-belt Ġermaniża ta’ Hamburg.
Matul il-ġimgħa li għaddiet mietu almenu 18-il persuna fl-Ewropa, wara li ħalbiet kbar tax-xita kkaġunaw diversi inċidenzi ta’ għargħar madwar il-kontinent.
Sadattant, bdew jonqsu l-livelli tal-għargħar f’Pariġi li, fl-aħħar jiem, kienu laħqu għoli allarmanti meta l-ilma tax-Xmara Seine faqgħet l-art. Madankollu, il-mużew ta’ Louvre u diversi stazzjonijet tal-ferrovija f’Pariġi għadhom magħluqin, bir-ristoranti qrib ix-xmara jibqgħu mgħarrqin u bid-dgħajjes ma jistgħux jgħaddu minn taħt il-pont.
Il-maltemp li laqat il-Ġermanja qaċċat is-soqfa tal-bini, fost rapporti dwar kantini mgħarrqin u għexieren ta’ siġar maqlugħin mill-għeruq. Dan meta mijiet ta’ ħaddiema għall-emerġenzi kellhom iwieġbu għal aktar minn 250 inċident.
