Il-Pulizija fl-Istat Amerikan ta’ Florida kkonfermaw li mill-lanqas 50 persuna nqatlu waqt sparatura ġo nightclub ta’ Orlando, bl-awtoritajiet lokali jiddikjaraw ‘stat ta’ emerġenza’. L-attakk qed jissemma fost l-agħar li qatt kienu diretti fuq massa ta’ persuni ġo post wieħed, fl-istorja riċenti tal-Istati Uniti.
Ir-raġel responsabbli mid-dmija kien identifikat bħala Omar Mateen, bir-rapporti jgħidu li hu nqatel waqt konfront mal-pulizija, f’ħin meta hu kien qed iżomm numru ta’ ostaġġi fin-nightclub.
Mateen, kmieni dalgħodu, qabad u fetaħ in-nar fuq in-nies li kienu qegħdin jiddevertu fl-istabbilment li jismu Pulse Club; bl-aħħar rapporti jirreferu wkoll għal ‘talanqas 53 midruba’.
L-uffiċjali intervistati f’Orlando qalu li, x’aktarx, kien hemm skop ideoloġiku wara l-qtil tan-nies fin-nightclub li kien frekwentat minn klijentele omosesswali. Ma kien hemm l-ebda informazzjoni li r-raġel armat kien assoċjat ma’ xi grupp partikulari.
Jaħsbu li s-suspettat, ċittadin Amerikan ta’ dixxendenza Afgana li kien ġej mill-belt ta’ Port St Lucie, ma kienx imniżżel fuq watch list għal terroristi potenzjali. Intant, ir-raġel identifikat bħala Omar Mateen kien anki qed ikun investigat għal att kriminali mhux assoċjat mat-terroriżmu.
Fl-aħħar sigħat, numru kbir ta’ qraba tan-nies li kienu fin-nightclub inġabru fl-isptarijiet ta’ Orlando, fost stennija ansjuża għal aħbar dwar l-għeżież tagħhom.
Ħafna minn dawn in-nies kienu rċevew telefonati u text messages mingħand qraba li kienu fil-Pulse Club waqt li kienet għaddejja l-isptaratura u li ma semgħux aktar mingħandhom mill-eqqel tad-drama ‘il hawn.
Iċ-ċifri tal-mejtin u midruba fl-attakk komplew ikunu aġġornati matul il-jum tal-bieraħ. Il-pulizija ta’ Orlando qalu wkoll li seħħet splużjoni kkontrollata fl-inħawi tal-Pulse Club. Dan meta l-belt ta’ Orlando, fl-aħħar sigħat, siċċat f’morsa ta’ tensjoni akuta.
L-awtoritajiet fi Florida sostnew li li kien hemm ‘il fuq minn 100 persuna fil-Pulse Club qabel seħħet id-drama u li fl-inċident instemgħu ‘it-tiri kontinwi u konsistenti’.
