Fi stqarrija l-Partit Nazzjonalista qal li fid-dawl tal-Avviż Legali li daħħal il-Gvern biex jagħlaq ħalq l-Oppożizzjoni milli titkellem dwar l-iskandlu tal-kumpaniji sigrieti taċ-Chief of Staff tal-Prim Ministru Keith Schembri u l-Ministru Konrad Mizzi, il-Qorti ddeċidiet li ma tilqax il-mandat li ressaq il-Partit Nazzjonalista dwar il-billboards politiċi.
Għalhekk, b’mod immedjat, il-Partit Nazzjonalista se jkun qed ineħħi l-billboards politiċi tiegħu mit-toroq Maltin u Għawdxin. Din id-deċiżjoni qed tittieħed b’rispett sħiħ lejn id-deċiżjoni tal-Qrati Maltin.
Id-deċiżjoni tal-Gvern laqtet ukoll b’mod gravi u dirett lin-negozji, għaliex tefa’ piżijiet u obbligi finanzjarji ġodda fuq dawn l-istess negozji.
Dwar dan l-Avviż Legali, l-Oppożizzjoni diġà ressqet Mozzjoni fil-Parlament biex l-Avviż Legali 103 tal-2016 ikun revokat.
