Emmanuel Camilleri, li spiċċa akkużat bla ħtija b’pedofelija minn bintu stess għadu għaddej minn tbatija kbira għaliex minkejja li dikjarat innoċenti, ismu għadu mniżżel fuq ir-reġistru ta’ persuni li wettqu reati sesswali. Qal dan l-avukat Tonio Azzopardi, li kien qrib Emmanuel Camilleri matul dan iż-żmien twil u diffiċli li għadda minnu.
Tonio Azzopardi qal “meta ġie skarċerat, naqset xi ftit it-tbatija imma bdiet tbatija oħra għaliex għalkemm irriżulta b’ċertezza assoluta li t-tifla kienet tat xhieda falza, jibqa’ l-fatt li ismu baqa’ mniżżel fuq ir-reġistru tal-pedofli.”
Għal dan l-għan, u biex tissolva anomalija fil-liġi, l-Oppożizzjoni permezz tax-Shadow Minister Jason Azzopardi ressqet Private Members’ Bill. Dr Azzopardi qal li “sfortunatament f’sentejn pajjiżna baqa’ ma għamel assolutament xejn biex isib is-soluzzjoni, kif kien l-obbligu tiegħu li jagħmel dan.”
Minkejja li issa għaddew diversi jiem mindu dan il-Private Members’ Bill ġie preżentat lill-Ispeaker, s’issa l-Gvern għadu ma ħabbarx meta se jiġi diskuss.
Dr Tonio Azzopardi sostna li “kemm-il darba din l-emenda tiġi appuntata malajr, almenu l-politiċi jkunu qed juru li hemm rieda tajba li jikkoreġu l-iżball ta’ dewmien li sewa’ vjolazzjoni kontinwata ta’ sentejn oħra għall-klijent tiegħi.” Żied jgħid li “jekk din il-Private Members’ Bill tibqa’ fuq l-ixkaffa u ma tiġix appuntata u deċiża fil-Parlament malajr, allura l-istat ikompli jitrattjeni, ikaxkar saqajh u aħna nkomplu nħallsu d-danni għal nuqqas tal-istat.”
Fl-aħħar jiem kienet ukoll Desiree Camilleri, mart Emmanuel, li fuq Facebook irringrazzjat lid-deputat Jason Azzopardi, għaliex fi kliema qed jagħtihom ċavetta ta’ ħajjithom.
Hi wkoll appellat lill-Ministru Owen Bonnici biex b’kuxjenza jaqbad u jiddiskuti malajr kemm jista’ jkun dan l-abbozz ta’ liġi.
