Ftit qabel l-ewwel intervent tiegħu fil-Parlament mill-vot favur il-Brexit, kelliem għall-Prim Ministru Ingliż David Cameron eskluda l-possibbiltà li jkun hemm referendum ieħor dwar is-sħubija.
Dan hekk kif kienet qed tingħata ħafna attenzjoni lil petizzjoni li qed tiċċirkola fuq l-Internet biex isir referendum ieħor kif ukoll li dan se jsir ladarba jintemmu n-negozjati mal-UE.
Fil-Parlament, Cameron tenna li għalissa ma kienx se jattiva dak magħruf bħala l-Artiklu 50, dik il-parti tal-Ftehim ta’ Lisbona li tieħu ħsieb it-tluq ta’ pajjiż minn sħubija fl-Unjoni Ewropea. Din ma kinitx se tkun attivata mill-Gvern preżenti. Hekk kif nhar il-Ġimgħa Cameron ħabbar ir-riżenja tiegħu wara li tilef il-vot, hu stqarr li kien se jħalli għas-suċċessur tiegħu biex jinforma formalment lill-UE li kien se jitlaq mill-UE.
Sadattant fost il-polemika kollha kemm fir-Renju Unit kif ukoll madwar l-UE, Matthew Elliott, iċ-chief executive tal-kampanja favur il-Brexit, qal li kien importanti li jkun imdewwem il-proċess formali għall-Brexit għax in-nies fis-sajf riedu jmorru fuq il-btala.
Sadattant hemm kriżi kemm fi ħdan il-Partit Konservattiv li jinsab fil-Gvern kif ukoll fil-Partit Laburista li jinsab fl-Oppożizzjoni.
It-Tlieta fi Brussel se jsir is-summit tal-Unjoni Ewropea fejn iċ-ċentru tal-attenzjoni se jkunu Cameron u l-Brexit.
