Il-vittmi tal-attakk terroristiku tat-Tlieta filgħaxija fl-ajruport internazzjonali ta’ Ataturk f’Istanbul telgħu għal 41 persuna, li minnhom 13 huma barranin.
Dan wara li tliet terroristi daħlu fid-departures lounge tal-ajruport jisparaw u meta kienu kkonfrontati mill-Pulizija splodew lilhom infushom. Hemm ukoll 239 persuna li ndarbu f’dan l-attakk.
Il-Prim Ministru Tork Binali Yildirim qal li kollox jindika li dan l-attakk kien xogħol l-ISIS hekk kif kien iddikjarat jum ta’ luttu nazzjonali fil-pajjiż.
Ir-rapporti ta’ kif seħħ l-attakk qed ivarjaw, imma jidher li t-terroristi fetħu n-nar fid-dħul fejn hemm il-makni tal-X-ray. Hawn inqala’ sparar mal-Pulizija u żewġ terroristi irnexxielhom jidħlu fejn fetħu n-nar fuq kull min ġie quddiemhom qabel ma splodew lilhom infushom.
S’issa kienet ikkonfermata l-identità ta’ 23 persuna li kienu Torok, ħamsa li kienu mill-Arabja Sawdija, tnejn mill-Iraq u persuna waħda miċ-Ċina, il-Ġordan, it-Tuneżija, l-Uzbekistan, l-Iran, l-Ukrajna u mara Palestinjana.
