Wara investigazzjoni li ilha sejra seba’ snin, inħareġ dak magħruf bħala c-Chilcot Report dwar l-invażjoni tal-Iraq fl-2003.
Rapport li ċanfar lill-Prim Ministru ta’ dak iż-żmien, Tony Blair, talli daħal f’din il-gwerra b’mod inadegwat u fuq informazzjonijiet u pariri legali żbaljati.
Iżda minkejja li Blair kien ikkritikat għal diversi affarijiet, ma ntqalx jekk Blair u l-Kabinett tiegħu kinux kisru l-liġi internazzjonali bl-aġir tagħhom.
Blair wieġeb li hu kien ħa d-deċiżjoni biex jidħol f’dik il-gwerra konvint li dak li kien qed jagħmel kien tajjeb. Hu għadu jemmen li kien aħjar li Saddam Hussien jitneħħa minn postu u ma jemminx li t-terroriżmu li hawn illum hu kkawżat minn dak il-pass li ttieħed flimkien mal-Istati Uniti biex jinvadu l-Iraq.
Blair, l-uniku Prim Ministru Laburista li rebaħ tliet elezzjonijiet konsekuttivi, dam imexxi għal għaxar snin sakemm fl-2007 irriżenja. Filwaqt li kien popolari fi żmienu, id-deċiżjoni li jinvadi l-Iraq kienet tebgħa fuq il-karriera tiegħu u l-qraba ta’ dawk li nqatlu u ndarbu f’dik il-gwerra spiss jkkritikawh. B’kollox, 179 suldat Ingliż tilfu ħajjithom f’dik il-gwerra.
Agħfas il-link għal aċċess għar-rapport
