Tnax-il persuni mietu waqt li għexieren oħra ndarbdu f’ħabta bejn żewġ ferroviji fl-Italja.
L-inċident seħħ għall-ħabta tal-11.30am bejn Bari u Barletta meta żewġ ferroviji kienu għaddejjin fuq l-istess linja fid-direzzjoni opposta u dan wassal għall-ħabta frontali bejn il-ferroviji.
Fuq il-post issejħu membri ta’ salvataġġ li qed jippruvaw joħorġu n-nies li jinsabu maqbuda fil-ferroviji. Fuq il-post intrama spazju fejn se tingħata l-ewwel għajnuna medika iżda wħud mill-persuni salvati qed jittieħdu l-isptar permezz tal-ħelikopter. Skont rapporti tal-midja internazzjonali, il-kaptan tad-dipartiment tal-brigada ta’ Andria, Riccardo Zingaro qal li jaħsbu li huma ħafna iktar dawk li tilfu ħajjithom.
Għalkemm xejn għadu m’hu konfermat, huwa maħsub li r-raġuni wara dan l-inċident huwa żball uman. Filfatt, waħda miż-żewġ ferroviji suppost kellha tieqaf u tistenna d-dawl aħdar qabel ma bdiet miexja.
Minn fuq l-istess linja li seħħ l-inċident, jgħaddu madwar 200 ferrovija kuljum lejn il-belt ta’ Bari u bħalissa qed issir ħidma biex issir it-tieni linja tal-ferrovija.
“Dan hu mument ta’ dieqa” – Il-PM tal-Italja
Il-Prim Ministru Taljan, Matteo Renzi tkellem dwar dan l-inċident u qal li dan l-inċident hu mument ta’ dieqa għall-Italja kollha. Saħaq li x-xogħol għandu jibqa’ għaddej sakemm tiġi identifikata r-raġuni għala seħħ dan l-inċident.
Iktar dettalji delwaqt.
