Theresa May hi l-Kap il-ġdid tal-Partit Konservattiv u se tkun it-tieni mara Prim Ministru tar-Renju Unit nhar l-Erbgħa, fejn se tieħu t-tmun tal-pajjiż b’erbgħa nazzjonijiet magħquda f’wieħed mill-aktar żminijiet diffiċli għar-Renju Unit.
Is-Segretarju għall-Intern ta’ 59 sena sabet ruħha f’din il-pożizzjoni wara r-referendum dwar il-ħruġ tar-Renju Unit mill-Unjoni Ewropea, magħrufa bħala Brexit. Il-Prim Ministru attwali David Cameron, li sejjaħ għal dan ir-referendum, mar kontra r-rieda ta’ numru kbir tal-membri tal-Partit Konservattiv billi ikkampanja sabiex ir-Renju Unit jibqa’ parti mill-Unjoni flimkien mas-27 pajjiż membru ieħor.
Il-fatt li l-partit apponta lilha bħala kap f’dan iż-żmien tant diffiċli turi l-livell ta’ rispett għoli li Theresa May tgawdi fil-Parti Konservattiv.
Fil-bidu tal-ħajja politika tagħha f’Westminister, Theresa May kienet renomata għall-għażla ta’ żraben li kienet tilbes – iżda kienet ir-rieda iebsa tagħha li ħalliet marka fil-politika. Fl-aħħar 17-il sena li ilha fil-partit, hi rnexxielha tkun waħda mill-ftit nisa li tifforma parti mit-tmexxija tal-Parti Konservattiv.
Min hi Theresa May?
Twieldet: 1 October 1956, għandha 59 sena
Edukazzjoni: gradwat mill-Universita’ ta’ Oxford
Familja: miżżewġa lil Philip May
Xogħol: Membru Parlamentari għal Maidenhead mill-1997, u Segretarju għall-Intern minn Mejju tal-2010
Passatempi: Tisjir, timxi qalb il-kampanja, tisma’ l-musika partikolarment lil Abba, Jersey Boys, Mozart u Elgar
Theresa May kisret rekord, hekk kif hi t-tieni l-aktar Segretarju għall-Intern li serviet fit-tul f’dawn l-aħħar 100 sena.
Missierha, Hubert, kien saċerdot tal-Knisja Ingliża u miet f’inċident bil-karozza meta hi kellha biss 25 sena. Hi twieldet f’Sussex, iżda trabbiet f’Oxfordshire. Theresa May, xhebba Brazier, żżewġet lil Philip May fl-1980. Il-ħbieb ta’ Theresa May jistqarru li minn ta’ eta’ żgħira jiftakru li hi diġa’ kellha aspirazzjoni biex tkun l-ewwel mara Prim Ministru, filfatt fuq intervista fuq l-istazzjon tal-BBC ħbieb stqarru li ma jiftakrux żmien li ma kellix interess fil-politika, u li ma tantx ħaditha tajjeb li Margaret Thatcher leħqet l-ewwel mara Prim Ministru tar-Renju Unit. Iżda bħal Margaret Thatcher, hi studjat fl-Universita’ ta’ Oxford. Waqt li kienet qegħda tistudja hemm, fit-tielet sena ta’ studju, iltaqat mar-raġel tagħha Philip, li kien President tal-Oxford Union li kien renomat biex jifforma żgħażagħ f’ambjent politiku.
Wara li gradwat fil-Geografija, fejn kellha l-ewwel xogħol tagħha mal-Bank of England fejn wara leħqet il-kariga ta’ Head of the Euroepan Affairs Unit of the Association for Payment Clearing Services.
Mill-bidu nett hi riedet ħajja fil-politika, fejn l-ewwel ġiet eletta bħala Kunsillier Lokali f’Merton fin-Nofsinhar ta’ Londra, iżda kompliet sakemm ġiet eletta fil-Parlament tar-Renju Unit. L-ewwel li kkontestat kien fl-1992 f’North West Durham li hu renomat għall-maġġoranza Laburista. fejn ġiet fit-tieni post wara Hilary Armstrong. Fl-istess elezzjoni kkontesta Tim Farron li llum hu l-mexxej tal-Partit Demokratiku Liberali. Sentejn wara ħarġet fuq Barking, fl-Lvant ta’ Londra, fejn marret aktar ħażin mill-ewwel darba, waqt li l-Partit Konservattiv kien qiegħed fl-għaddej fl-agħar żminijiet tiegħu.
Minkejja li fl-1997, il-Partit Laburista żied fil-popolarita’ b’Tony Blair fil-poter, Theresa May irnexxielha tirbaħ is-siġġu minn Berkshire li żammet minn dakinhar sal-llum. Fl-1999 kienet fix-Shadow Cabinet ta’ William Hague bħala Shadow Segretarju għall-Edukazzjoni, u fl-2002 saret l-ewwel Chairman mara tal-Partit taħt Iain Duncan Smith. Fl-2009 kompliet żżid il-popolarita’ fejn ingħatat il-kariga ta’ Shadow Segretarju għax-Xogħol u l-Penzjonijiet. L-aħħar tarġa biex leħqet Segretarju għall-Intern ġiet meta saret il-koalizzjoni bejn il-Konservattivi u d-Demokratiċi Liberali. Minkejja li numru kbir tal-preċedessuri tagħha f’din il-kariga ta’ Segretarju għall-Intern, Theresa May irnexxielha żżomm l-kariga tagħha u tibqa’ popolari mal-pubbliku.
Fl-irwol tagħha bħala Segretarju għall-Intern, hi stqarret li wieħed mill-akbar suċċessi tagħha kien meta Londra evitat attakk terroristiku qawwi u fl-2013 iddeportat lir-radikalista Abu Qatada, u kif ukoll waqqfet l-estradizzjoni lejn l-Istati Uniti tal-hacker tal-kompjuters Gary McKinnon. Minn naħa l-oħra, Theresa May ġiet kritikata meta l-Uffiċju tal-Passaporti u sussegwenatment l-Gvern falla milli jżomm il-wegħda tiegħu u jnaqqas il-migrazzjoni għall-inqas ta’ 100,000 fis-sena.
U dwar Brexit?
Il-frażi li biha baqgħat magħrufa Theresa May hi ‘Brexit means Brexit’, li biha fissret li mhux se jkun hemm referendum ieħor dwar dan ir-rigward, u li r-riżultat tal-maġġoranza jrid jiġi rispettat. Hi stqarret li t-taħdidiet uffiċjali mal-Unjoni Ewropea, li jibdew hekk kif r-Renju Unit jiskattaw l-artiklu 50 tat-Trattat dwar il-Funzjonament tal-Unjoni Ewropea li bih jibda l-proċess biex toħroġ, hi qalet li mhux se jidbew qabel l-aħħar tal-2016. Theresa May insistiet li l-istatus ta’ ċittadini li ġejjin minn stati membri tal-Unjoni Ewropea mhux se jinbidel sakemm ftehim legali jintlaħaq. L-għan tagħha hu li żżomm żewġ drittijiet tal-Unjoni Ewropea, dawk tal-moviment ħieles tas-servizzi, u l-moviment ħieles tal-merkanzija.
