Boris Johnson, is-Segretarju tal-Affarijiet Barranin Ingliż, it-Tnejn attenda għall-ewwel laqgħa tiegħu tal-Ministri tal-Affarijiet Barranin tal-UE.
Dan kien id-debutt ta’ Johnson fix-xena internazzjonali. Preżenti għal-laqgħa fi Brussell kien hemm ukoll John Kerry, is-Segretarju tal-Istat Amerikan – l-ewwel darba li Segretarju tal-Istat Amerikan attenda għal laqgħa simili.
Hawn hu insista li l-ħruġ tar-Renju Unit mill-Unjoni Ewropea, dak magħruf bħala l-Brexit, ma kienx ifisser li Londra kienet se tagħlaq il-bieb għall-Ewropa jew tabbanduna l-Unjoni Ewropea għalkollox.
L-eks-Sindku ta’ Londra qal li r-Renju Unit ried iżomm ir-rwol ewlieni fl-Ewropa, anki wara l-Brexit.
Johnson żied li l-UE kellha bżonn tweġiba kkoordinata għat-terroriżmu fil-konfront tal-attakk ta’ Nizza u l-oħrajn ta’ qablu.
