Hillary Clinton issa hi uffiċjalment il-kandidat tal-Partit demokratiku għall-elezzjoni Presidenzjali Amerikana. Żvilupp li bih issa tniżżlet fl-istorja bħala l-ewwel mara li kienet nominata minn partit politiku ewlieni Amerikana biex tikkontesta l-elezzjoni għal President.
Clinton kienet nominata formalment fit-tieni lejl tal-Konvenzjoni Nazzjonali Demokratika li qed isir f’Philadelphia – disa’ snin wara li kienet għamlet l-ewwel sforz tagħha għall-elezzjoni Presidenzjali. Dak inhar, in-nomina kienet intrebħet minn Barack Obama.
Il-lejla kienet waħda dedikata lill-għaqda fi ħdan il-partit wara diversi kontroversji fosthom li l-ogħla tmexxija tal-partit kienet qed tiffavorixxi lil Clinton fuq l-avversarju tagħha Bernie Sanders. Imma kien l-istess Sanders li esprima l-appoġġ tiegħu għan-nomina ta’ Clinton.
Sadattant fl-istħarriġ tal-opinjoni pubblika ftit li xejn hemm ċaqliq bi Clinton u Trump ras imb ras, bi Trump f’xi wħud minnhom igawdi minn distakk fuq Clinton u indikazzjoni li din se tkun elezzjoni missielta sal-aħħar.
