Raġel ta’ 62 sena waqa’ f’bir waqt li kien qed jagħmel xi xogħlijiet f’residenza f’Ħal Għaxaq. Jidher illi waqt li kien nieżel fil-bir, inkiser is-sellun u waqa’. Għalkemm ir-raġel weġġa’, hu tela’ waħdu minn ġol-bir.
Ambulanza li ssejħet fuq il-post ħadet lir-raġel l-isptar u ftit tal-ħin wara ġie ċċertifikat li qed isofri minn ġrieħi ta’ natura gravi.
L-inċident seħħ għall-ħabta tad-09.30 ta’ dalgħodu, meta l-pulizija rċiviet rapport li persuna kienet waqgħet f’bir fi Triq il-Lellux f’Ħal Għaxaq.
