Reno Bugeja ntgħażel għaż-żjarat fiċ-Ċina, l-Ażerbajġan u Singapore
Hekk kif fi tmiem din il-ġimgħa, l-Prim Ministru Joseph Muscat, ċ-Chief of Staff tal-Prim Ministru Keith Schembri u l-Ministru responsabbli mill-proġetti tal-enerġija Konrad Mizzi marru s-Singapore biex jaraw it-tanker tal-gass li l-Gvern Laburista se jġib fil-bajja ta’ Marsaxlokk, minn din iż-żjara joħroġ fatt interessanti. Għal kull żjara li Muscat jagħmel dwar l-enerġija, l-ġurnalist li jirrapporta din iż-żjara f’isem l-istazzjon nazzjonali jkun il-Kap tal-Kamra tal-Aħbarijiet tal-PBS Reno Bugeja.
Fil-fatt, Reno Bugeja kien il-ġurnalist li mar ma’ Muscat iċ-Ċina f’Settembru 2013 meta kien hemm it-taħdidiet ma’ Shanghai Electric dwar il-bejgħ tal-Enemalta, mar ukoll l-Ażerbajġan f’April 2015, meta Muscat kellu negozjati mal-President tal-Ażerbajġan Aliyev, u fi tmiem il-ġimgħa li għaddiet, Reno Bugeja mar ukoll Singapore ma’ Muscat, Schembri u Mizzi.
Il-fatt li għal dawn iż-żjarat – li huma kollha dubjużi minħabba d-deals li qed isiru dwar l-enerġija – dejjem mar Reno Bugeja u ebda ġurnalist ieħor mill-PBS iqajjem ħafna dubji, kif ukoll rabja fi ħdan l-istess PBS.
L-aktar żjara li kienet fl-aħbarijiet kienet dik fl-Ażerbajġan meta l-gazzetta il-Mument żvelat li l-aħbarijiet li kienu qed jixxandru fuq il-PBS kienu qed jintbagħtu mill-Kap tal-Komunikazzjoni tal-Prim Ministru Kurt Farrugia b’email lil Reno Bugeja.
Il-Partit Nazzjonalista ilu għal dawn l-aħħar xhur bi kritika ħarxa għall-aħbarijiet tal-PBS b’akkużi ta’ gatekeeping, jiġifieri li l-PBS jagħżel xi jxandar u ma jxandarx, skont x’impatt se tkun qed tħalli l-aħbar partikolari fuq Kastilja u l-Prim Ministru Joseph Muscat.
