Fil-Maċedonja mietu talanqas 20 persuna fost għargħar għall-għarrieda li ġarr l-inħawi tal-kapitali Skopje. Dan meta wħud mill-vittmi nstabu mgħarrqin fil-vetturi tagħhom.
It-traġedja segwiet inċidenza ta’ maltempati kbar f’din z-zona, bis-Sindku ta’ Skopje, Kove Trajanovski, isostni li ‘r-residenti tal-kapitali ma raw qatt fenomenu qattiel ta’ dan it-tip’.
L-iskwadri għall-emerġenzi, fl-aħħar sigħat, irnexxielhom jirkupraw il-katavri tal-vittmi, iżda kien hemm ukoll il-persuni neqsin li baqgħu ma nstabux.
L-għargħar spiċċa jġorr parti mir-ring road ta’ Skopje, bir-riżultat li numru kbir ta’ karozzi tkaxkru mal-ilma u spiċċaw qalb l-għelieqi. Jaħsbu li, waqt il-maltempati, niżlet 93 millimetru ta’ xita fuq Skopje li hu aktar mill-medja għax-xahar ta’ Awwissu kollu.
L-aħħar rapporti mill-inħawi qalu li ‘l-ambulanzi ma waqfux mill-vjaġġi’ u li l-Armata qed tgħin f’sitwazzjonijiet ta’ emerġenza. Dan waqt li numru ta’ nies kienu trattati l-isptar għall-ġrieħi.
