L-Istati Uniti qalet li bagħtet 15 il-priġuniera tal-kumpless fil-Bajja ta’ Guantanamo (f’Kuba) lejn l-Emirati Arab, b’dan ikun l-akbar trasferiment uniku ta’ priġunieri li qatt seħħ waqt l-amministrazzjoni tal-President Amerikan, Barack Obama.
Il-Pentagon f’Washington qal li t-trasferiment ta’ 12 il-nazzjonal Jemeni u tliet Afgani jfisser li, fil-preżent, fadal ‘biss’ 61 priġunier fil-faċilità ta’ Guantanamo, li qed titmexxa mill-Amerikani.
Il-priġunieri li ntbagħtu minn Guantanamo kienu qed jinżammu fil-kumpless mingħajr ma tressqulhom l-akkużi, b’uħud idumu talanqas 14 il-sena f’dik is-sitwazzjoni.
Il-President Obama jrid jagħlaq il-kumpless ta’ Guantanamo qabel jispiċċa mill-Presidenza tal-Istati Uniti.
Il-ħabs ta’ Guantanamo kien inawgurat, f’Jannar tal-2002, mill-eks President tal-Istati Uniti, George W. Bush. L-iskop tal-faċilità kien li jinżammu l-persuni suspettati dwar it-terroriżmu wara l-attakki tal-11 ta’ Settembru tal-2001, minn terroristi tal-Al-Qaeda, fuq l-ibliet Amerikani ta’ New York u Washington.
Il-priġunieri fi Guantanamo anki inkludew suspettati li nħatfu wara l-invażjoni tal-Afganistan mill-qawwiet Amerikani, li kienet seħħet ftit wara l-attakki storiċi kontra l-Istati Uniti.
