Il-kandidat Donald Trump li se jikkontesta għall-Presidenza tal-Istati Uniti f’isem il-Partit Repubblikan, qal li jekk jirbaħ il-Presidenza se jaċċerta li l-immigranti f’pajjiżu jkunu suġġetti għall-analiżi u eżamijiet bir-reqqa, bħala parti minn ‘vetting estrem’.
Trump, li kien qed jitkellem fl-Istat ta’ Ohio, fassal il-pjani tiegħu biex jikkumbatti l-estremisti Iżlamiċi u fost oħrajn spjega proċess ġdid ta’ screening għall-barranin li jaslu fl-Istati Uniti. Skont Trump, l-applikanti għal residenza fl-Istati Uniti jridu jkunu suġġetti għal prova li tiddetermina jekk huma jaqsmux l-istess valuri liberali u tolleranza reliġjuża bħaċ-ċittadini tal-Punent.
Il-pjan ta’ Donald Trump jesiġi biex ċittadini li ġejjin minn pajjiżi bi storja ta’ terroriżmu jkunu pprojbiti mill-Istati Uniti, għalkemm ma speċifikax lill-pajjiżi partikulari. Waqt li tkellem f’Ohio, Trump lanqas ma ppropona strateġija militari għal kontra t-terroristi tal-ISIS, iżda rrepeta li ‘kien oppona għall-gwerra ta’ snin ilu fl-Iraq sa minn qabel kienu bdew l-ostilitajiet f’dak il-pajjiż tal-Golf.’
Hu, fl-istess ħin, beħsiebu jagħmel l-alleanzi ‘mal-pajjiżi kollha li qed jiġġieldu kontra t-terroriżmu’.
Min-naħa tagħha, Hillary Clinton, il-kandidat tal-Partit Demokratiku għall-White House irredikolat il-pjan ta’ Trump rigward l-immigrazzjoni bħala ‘manuvra ċinika li ma tistax tittieħed bis-serjetà.
