1. L-approvazzjoni ta’ numru ta’ torrijiet fl-Imrieħel u f’Tas-Sliema mill-Awtorità tal-Ippjanar ħalliet lill-maġġoranza tal-poplu b’togħma xejn tajba. L-opinjoni ġenerali hija kontra dan l-iżvilupp. Kontra li fil-pajjiż tagħna tidħol din il-linja ta’ bini, u dan għal diversi raġunijiet. Mill-iktar fil-qosor għax l-ewwel minħabba l-estetika, it-tieni l-karattru sħiħ tal-art, it-tielet għax bżonn veru ma hemmx għalihom. Rajt reazzjonijiet differenti minn numru ta’ bnedmin ta’ rieda tajba. Uħud fuq naħa ħassewha iktar għax kienu daħħlu lilhom infushom biex jemmnu li dan il-Gvern Laburista ġdid dawn l-affarijiet mhux se jippermettihom iktar meta kienu jisimgħu li Malta hija tagħna lkoll.
Maħduma minn qabel
2. Ħafna drabi, ulied is-sewwa ma jkollhomx il-ħażen li għandhom oħrajn. Minflok sabu l-kontra. Sabu fil-verità r-riżultat ta’ snin ta’ ħidma biex naslu hawn. Il-kontrolli kollha li kien hemm qabel issa tneħħew u l-bieb infetaħ beraħ għal dawn it-tipi ta’ proġetti. L-ewwel mossa determinanti saret appena l-Awtorità tal-Ippjanar infirdet minn dik tal-Ambjent. Minkejja dak kollu li ngħad fil-Parlament mill-Ministru ta’ dak iż-żmien Leo Brincat, din ma servietx biex tissoda iktar l-aspett ambjentali imma deċiżament il-kontra. Ċert li min kien qiegħed jippilotaha ma kienx qiegħed jagħmel dan b’intenzjonijiet żbaljati. U ġew iktar bizzilla l-affarijiet kif min kien deċiż li jwettaq dak li kien qal, issa tneħħa konvenjentement min-nofs f’limbu politiku interessanti. Ikolli ngħid, ma naħsibx li qabel wisq.
Min kien hemm warajha?
3. L-ambjent bl-awtorità tiegħu issa tilef kull saħħa li kien akkwista taħt amministrazzjonijiet differenti. Kien fil-qalba tal-punt u mhux qiegħed jilgħab away imma home huwa wkoll. Dak il-gwardjan tal-post fejn ngħixu tal-pajjiż li nħobbu ġie deċiżament żarmat. L-id warajha ma kienet ta’ ħadd ħlief tal-Gvern preżenti. Għadda biż-żmien lil diversi persuni ta’ kwalità li jiktbu spiss ukoll. Uża l-pinna tagħhom meta kien fl-Oppożizzjoni, uża wkoll il-kunsens tagħhom biex għamel preċiżament u direttament il-kontra ta’ dak li ħasbu fl-innoċenza tagħhom huma. Kien hemm mewġa li ħakmitna. Iżda llum it-tort ta’ dan kollu huwa ta’ din l-amministrazzjoni. Sa issa, forsi żbaljat, imma għadni ma qrajt b’ebda ministru jew segretarju parlamentari jingħaqad mal-poplu u jikkundanna dawn it-torrijiet ta’ Babel. Smajt minflok diversi jistaqsu dwar fejn spiċċat il-kuxjenza soċjali ta’ dan il-Kabinett.
F’min se nwaħħlu
4. Kemm kienet iktar komda u konvenjenti li minn meta ttieħdu dawn id-deċiżjonijiet żbaljati l-gazzetti kienu mimlija b’ta’ min huwa t-tort. Fejn smajna kif membru, Timmy Gambin, li l-ewwel qalulna li rċieva ittra li ma qrahiex u wara qalilna li ma kienx obbligat jagħmel dan. Wara kif weħel iċ-Chairman tal-Awtorità tal-Ambjent il-Profs. Victor Axiaq. Għax messu, minkejja li kien għadu kif ħareġ mill-isptar, jattendi. Weħlu fin-nofs diversi oħra f’forma ta’ telenovella aqwa minn dawk Spanjoli mmarkata biex taljena u twaħħal f’min proprju ma għandux tort. Bniedem ta’ dik l-integrità u l-esperjenza ma hu se jinxtara proprju minn ħadd. Fuq dan anzi ħafna fehmu li kemm ġewwa l-Awtorità tal-Ippjanar u fil-Gvern ċertament li kien hemm min jaf li kien ma jiflaħx jattendi. Allura wieħed jistaqsi: jekk għall-Gvern il-vuċi tal-Ambjent hija daqshekk importanti, kif il-membri maħtura minnu ma ħadux ħsieb li fl-assenza tiegħu flok jibqgħu għaddejjin, jiffissaw minflok il-laqgħa għal meta seta’ jattendi?
Il-Knisja difensur
5. Il-Knisja llum immarkat iż-żminijiet u qiegħda tieħu l-pożizzjonijiet għas-sewwa differenti minn qabel. Spikkat bil-vuċi tal-mexxej l-Arċisqof Charles Scicluna li ħadd ma jista’ jmeri li kienet ċara, preċiża, diretta u mhux politika. L-artiklu tiegħu ‘The Midas Curse’ li deher f’diversi gazzetti huwa sejħa qawwija favur il-ġid komuni u li jmiss il-kuxjenza. Il-kliem tiegħu “Shame on the Planning Authority that seems to be insensitive to the visual impact of these cement monstrosities on the soft rambling contours of our countryside and traditional townscapes. Shame on the government authorities that chose to include Mriehel at the last moment in the list of areas earmarked for high rises without giving civil society the opportunity to voice any sort of concern” hu prova ta’ dan. Kliem li għalih sa issa ma rajtx wisq tweġibiet. Rajt anzi li l-pożizzjoni tal-Knisja ma hix ma’ ta’ dawk li għandhom il-flus imma għadha d-difensur ta’ dawk li huma minn taħt. Aqwa minn hekk, il-Knisja ma hija fil-but ta’ ħadd.
It-tort tal-Gvern
6. L-artiklu jistaqsi iktar fil-fond u b’saħħa: “Who will defend us from those who took the solemn oath to defend the common good without fear or favour?”. Il-proċess kollu qiegħed għal diversi jidher li huwa mimli b’makakkeriji u irregolaritajiet. Il-mossi, il-ħbula nġibu direttament minn fuq, min-naħa tal-Gvern li huwa ċar li ried li dawn it-torrijiet jiġu approvati. Ma kien hemm ebda kundanna, anqas dikjarazzjonijiet, li se jittieħdu xi passi biex il-Kabinett iwaqqaf dan. Kien hemm biss strateġija maħduma li bdiet bl-ewwel li titwarrab min-nofs l-Awtorità tal-Ambjent u wara ġġib lil dik tal-Ippjanar għas-servizz ta’ sidien tat-torrijiet bħal dawn. Wara twaħħal f’min ma għandhiex. It-tort mhux ta’ bnedmin li smajna isimihom, imma tal-Gvern.
Din l-art għadha ħelwa
7. Tul din il-ġimgħa qrajt artiklu li jgħid ħafna. Is-sottotitlu kien ‘Din l-art kerha; Malta’s new national anthem’. Nifhem u napprezza r-reazzjonijiet oġġettivi ta’ Martin Scicluna, iktar u iktar xħin kiteb: “These are vanity projects unworthy of a Prime Minister who was elected to office promising ‘to protect environmental standards … because our children deserve this’.” Iżda preżentement pajjiżna għadu wieħed sabiħ. Għadna ‘Din l-Art Ħelwa’. Għax nistgħu ninbidlu jekk it-torrijiet ta’ Babel isiru u mhux jaqgħu. Għalhekk appell mill-aspett legali għal din id-deċiżjoni, għamel sewwa li se jagħmlu l-Kunsill Lokali ta’ Tas-Sliema u magħhom nittamaw jingħaqdu l-Awtorità tal-Ambjent u diversi għaqdiet oħra. Biss appell iktar deċiżiv u ta’ prova jista’ jsir mill-Gvern biex jibdel dan l-iżball kbir tiegħu. Għax irid jingħad li jekk iħalli kollox għaddej, se jiżdiedu dawk li diġà qegħdin jifhmu li Malta, ‘Din l-Art Ħelwa’, kienet diġà tagħna lkoll qabel l-elezzjoni ġenerali mentri llum inbidlet u hija tal-ftit.
